Հայաստանի վրայով օրական մի հատ չվերթ է իրականացվում Ադրբեջանից Գյանջա․ Ավիացոն փորձագետ Նավիկ Խաչատրյան

<<Այսօր մեր ավիացիան  կարելի նկարագրել վրացերեն շատ հարմար մեկ բառով․ՀՀ-ի ավիացրան գտնվում է «ճանտրակուլի»  վիճակում՝ ավերված, քանդված։ Ավիացիան համարվում է բիզնեսի ամենաինտելեկտուալ ոլորտներից մեկը, իսկ բիզնեսն ու քաղաքակսնությունը միասին են։ Հիմա ինչ քաղաքականություն, որ տեսնում եք երկրի ներսում, նույնը արտացոլվում է՝  մյուս բիզնես բնագավառներում, այդ թվում ավիացիայում>>,- <<Իրավունքի>> հետ զրույցում անդրադառնալով ՀՀ-ի ավիացիոն ոլորտում առկա իրավիճակին, ասաց  ավիացիայի փորձագետ Նավիկ Խաչատրյանը, ընդգծելով․

-Առհասարակ,  Հայաստանի ավիացիան 20 տարով հետ է մնացել աշխարհում ավիացիոն զարգացումներից։ Սա ցավալի է արձանագրելը, բայց Արմավիայի սնանկացումից հետո մնացած ամեն ինչը վարի տրվեց, ավիացիան իջավ պլենտուսից ցածր:Այն դեպքում, երբ
 Հայաստանի աշխարհագրական դիրքը թույլ է տալիս, որ ինչպես ժամանակին Մետաքսի ճանապարհը անցնում էր Սյունիքով, հիմա էլ Հայաստանը կարող էր իր խոշոր օդանավերով  Չինաստանն ու Հնդկաստանը կապել Եվրոպայի հետ։ Մենք դրա համար 2019-ին բիզնես պլան էինք գրել, ներկայացրել Տաթևիկ Ռևազյանին, բայց մերժեց՝ ծիծաղելի պատճառաբանությամբ։

-Պարոն Խաչատրյան, օրերս հայտնի դարձավ, որ Թուրքիայի ավիացիոն իշխանությունները FLYONE ARMENIA ընկերությանը չեն տրամադրել Թուրքիայի օդային տարածքով դեպի եվրոպական երկրներ չվերթների իրականացման (overflight) հնարավորություն։ Սա ինչի՞ հետեւանք է։

-Նախկինում Թուրքիայի օդային տարածք մտել են մեր օդանավերը, հիմա եթե քաղաքական որոշումներ կան, որ կարգավորում ենք հարաբերությունները և եթե իրենց օդանավերն ամեն օր թռչում են Ադրբեջան, ի՞նչ պատահեց, որ Հայաստանի օդանավերին թույլ չեն տալիս մտնել Թուրքիայի օդային տարածք: Սա անհեթեթություն է: Բացի այդ, կա քաղաքականություն, որն օժանդակում է, որ ամեն երկիր, որը պոտենցիալ ճանաչում է ԵՄ-ի ժողովրդավարական արժեքները, ինքը չպետք է խոչընդոտ հադիսանա մյուս երկրների օդանավերի համար: Եթե ինչ-որ թեմա է եղել, դրա համար են փակել, դա կարող էին անել: Օրինակ, եթե հատուկ ծառայությունները տեղեկատվություն ունեն, որ այդ չվերթով ինչ-որ արգելված կամ անցանկալի բեռ է տեղափոխվում, կարող են չթողնել: Բայց պետք է ապացուցեն, հենց այնպես չեն կարող ասել՝ չեք կարող թռչել ու վերջ։

Այստեղ ես ավելի շատ հակված եմ նրան, որ այստեղ իշխում է քաղաքական կոմպոնենտ։ Ո՞նց կարելի է գնալ դիվանագիտական հարաբերությունների կարգավորման և միաժամանակ թույլ չտալ օդային տարածքն օգտագործելը, դա անհնար է։

Հետո, եթե Թուրքիան փակում է իր օդային տարածքը, ուրեմն տրամաբանական կլիներ, որ ՀՀ-ն էլ թույլ չտար իր օդային տարածքով ադրբեջանական կամ թուրքական ավիաընկերությունների թռիչքը։ Հիմա հարցն այն է, թե ինչու Հայաստանը պատասխան քայլեր չի ձեռնարկում, մինչդեռ պատասխան քայլեր ձեռնարկելով դու ցույց ես տալիս, որ ուժեղ երկիր ես, տիրապետում ես քո օդային տարածքին, ոչ թե գլուխդ կախում ես, իրենք էլ ինչ ուզում՝ անում են։ ICAO-ն ամեն ինչում հավասարություն է պահանջում, հավասարություն և երկկողմանիություն, օդային հաղորդակցությունը պետք է լինի 100 տոկոս հայելային, ինչ մեկին է թույլատրվում՝ թույլատրվում է նաև մյուսին։

Մենք պետք է հայելային պատասխան տանք Թուրքիային, տեսեք, Հայաստանի վրայով օրական մի հատ չվերթ է իրականացվում Ադրբեջանից Գյանջա, ինքնաթիռը վայրեէջք է կատարում Նախիջեւան-Գյանջա մարշուտի վրա։ Մենք թույլ ենք տալիս, մինչդեռ թուրքերը մեզ թույլ չեն տալիս՝ ինչո՞ւ, ո՞ւր է մեր ավիացիոն իշխանությունը։

Զրույցը՝ ԻԼՈՆԱ ԱԶԱՐՅԱՆԻ