Չպետք է տուրք տալ Բայդենի ծերունական քմահաճույքներին. Գրիգոր Բալասանյան
ՏեսանյութերՄայիսյան եռատոնն անցավ դժգույն ու դժբախտ: Պետական մակարդակով բավարարվեցին միայն արարողակարգային ծաղկեպսակների տեղադրմամբ` Եռաբլուրում եւ «Հաղթանակի» զբոսայգում: Ի վերջո, պետք էր պատշաճ նշե՞լ, թե՞ սգալ այդ օրը, «Իրավունքը» պարզեց ԵՊՀ միջազգային հարաբերությունների եւ դիվանագիտության ամբիոնի դոցենտ, պատմական գիտությունների թեկնածու ԳՐԻԳՈՐ ԲԱԼԱՍԱՆՅԱՆԻ տեսակետը:
– Կարծում եմ` նշել պետք էր: Ճիշտ է, մեր եռատոնը մի փոքր խաթարվել է եւ տոներից մեկն այս պահին ամբողջ ծավալով չենք կարող նշել, որովհետեւ գեղեցկուհի Շուշին ժամանակավոր գերության մեջ է, բայց սա չպետք է մեզ վհատեցնի: Այսօր մեզ ուժ պետք է տա մայիսի 9-ի մեր պապերի հաղթանակը Մեծ հայրենականում: Այն պետք է դառնա սկիզբը մեր հաջողությունների: Այնպես որ, մայիսի 9-ն անպայման նշել պետք էր:
– Ի դեպ, մեր աչքից չվրիպեց այն, որ անհայտ զինվորի հիշատակը հավերժացնող անմար կրակի մոտ ծաղկեպսակ էր դրված նաեւ Եվրամիության պատվիրակության կողմից: Ի՞նչ կասեք այս մասին, երբ այս օրերին Ռուսաստանը կրկին պայքարում է ֆաշիզմի դեմ, իսկ Արեւմուտքն` ըստ էության, սատարում ֆաշիստներին:
– Եվրոպական միության պաշտոնյաներն ինչքան էլ տուրք են տալիս Բայդենի ծերունական քմահաճույքներին, իրենք էլ ներքուստ հասկանում են, որ այն, ինչ կատարվում է Ուկրաինայում, առաջինը հերթին հարվածում է հենց ԵՄ-ին: Եվ ես շատ ուրախ կլինեմ, որ Հայաստանը լինի կամուրջ Ռուսաստանի եւ Եվրամիության միջեւ` ինչ-որ հարցերում հայտարարի գալու, միգուցե ինչ-որ սուր անկյուններ հարթեցնելու եւ այս չարաբաստիկ ու կործանարար պատերազմին վերջ տալու համար: Ինձ համար զարմանալի էր եւ, անկեղծ ասած` հաճելի, երբ ՌԴ դեսպանատան ու այլ երկրների դեսպանատների կողմից դրված ծաղկեպսակների կողքին դրված էր նաեւ Եվրոպական միության պատվիրակության կողմից դրված ծաղկեպսակը: Սա խոսում է այն մասին, որ ամեն դեպքում, Եվրոպական միության պաշտոնյաները կամ գոնե բնակչության մի հատված հիշում է Երկրորդ աշխարհամարտը եւ Հայրենական մեծ պատերազմը, ու ներքուստ իրենք էլ, երեւի թե, համաձայն չեն այն քաղաքականության հետ, որը վարվում է պետական այրերի կողմից:
ՀՐԱՆՏ ՍԱՐԱՖՅԱՆ
Հ.Գ.- Հարցազրույցն ամբողջությամբ կարդացե՛ք թերթի առաջիկա համարներից մեկում: