ՌԵՎԱԶՅԱՆԸ ՀԱՍՏԱՏԵՑ, ՈՐ ԸՆՏԱՆՅՈՔ ՀԱՆԴԵՐՁ ՏԵՂԱՎՈՐՎԵԼ ԵՆ ՊԵՏԱԿԱՆ ԿԱՌՈՒՅՑՈՒՄ

Դեռեւս երկու շաբաթ առաջ գրավոր հարցում էինք ուղարկել Քաղավիացիայի կոմիտեի նախագահ Տաթեւիկ Ռեւազյանին՝ պարզաբանումներ խնդրելով շրջանառվող աղմկահարույց լուրերի հետ կապված: «Հարգելի տիկին Ռեւազյան, մամուլում անդրադարձ եղավ մասնավորապես հետեւյալ բովանդակությամբ. «Քաղավիացիայի կոմիտեի նախագահը, ընտանյոք հանդերձ, բնակվում է հենց կոմիտեի շենքում: Մեր տեղեկություններով, ամուսինը շրջում էր քաղավիացիայի վարչական տարածքում, ելումուտ անում այնպիսի վայրեր, որտեղ մուտքի իրավունք ունեն սահմանափակ թվով աշխատակիցներ»:

1. Որքանո՞վ է վերը նշվածը համապատասխանում իրականությանը, եթե այդպես է, ապա խնդրում ենք մանրամասնել:
2. Ինչո՞ւ պատերազմի ժամանակ մեր ավիացիան չկարողացավ հավուր պատշաճի աշխատել:
3. Դո՞ւրս է եկել արդյոք ՀՀ-ն Եվրոպայի ավիացիոն «սեւ ցուցակից»:
4. 2020 թվականի հունվարից հայտարարվել էր, որ «Ryanair» ավիաընկերությունը Երեւանից Եվրոպա թռիչքներ կիրականացնի սկսած 35  եվրոյից:

Նշելով, որ սա Հայաստանի  առաջին բյուջետային ավիաընկերությունն է, ինչը տուրիզմի ոլորտում կարեւոր փոփոխություն է: Խնդրում ենք պարզաբանել, որտե՞ղ է տվյալ ավիաընկերությունը այսօր: Եվ ինչո՞վ է օգնել ՀՀ-ին՝ պատերազմի ժամանակ»:

Միայն երկու շաբաթ անց օրենքի խախտումով մեզ բարեհաճել է պատասխանել անձամբ տիկին Ռեւազյանը.

- 2021 թվականի փետրվարի 11-ի Ձեր գրության կապակցությամբ տեղեկացնում ենք հետեւյալը.

1-ին հարցի վերաբերյալ հայտնում ենք, որ ՀՀ կառավարության 2020 թվականի սեպտեմբերի 27-ի «Հայաստանի Հանրապետությունում ռազմական դրություն հայտարարելու մասին» թիվ 1586-Ն որոշմամբ Հայաստանի Հանրապետության ամբողջ տարածքում 2020 թվականի սեպտեմբերի 27-ից հայտարարվել է ռազմական դրություն: Ղեկավարվելով «Պաշտպանության մասին» ՀՀ օրենքի 7-րդ հոդվածի 1-ին մասի 9-րդ կետի «ե» ենթակետով՝ Քաղաքացիական ավիացիայի կոմիտեն (այսուհետ՝ Կոմիտե) իրեն վերապահված լիազորություններն իրականացրել է շուրջօրյա աշխատանքային ռեժիմով: Ցանկանում ենք տեղեկացնել, որ թուրք-ադրբեջանական դաշինքի կողմից սանձազերծված 44-օրյա պատերազմի ընթացքում Կոմիտեում սահմանված էր շուրջօրյա աշխատանքային ռեժիմ, ինչը ենթադրում էր մի շարք աշխատողների քսանչորսժամյա ներկայություն Կոմիտեում: Կոմիտեի աշխատանքային գործընթացը համակարգվել եւ կազմակերպվել է Կոմիտեի նախագահ Տաթեւիկ Ռեւազյանի անմիջական հսկողությամբ: Հաշվի առնելով այն հանգամանքը, որ Կոմիտեի նախագահը ռազմական դրության ժամանակ գրեթե միշտ գտնվել է աշխատավայրում, օպերատիվ որոշումների կայացման անհրաժեշտությունից ելնելով, ինչպես նաեւ այն, որ նրա նորածին երեխային անհրաժեշտ էր մայրական խնամք, ինչը սահմանված է նաեւ ՀՀ աշխատանքային օրենսգրքի 258-րդ հոդվածի 5-րդ մասի դրույթներով, վերջինիս հարազատները նրան աջակցելու նպատակով երբեմն այցելել են Կոմիտեի վարչական շենք: Կոմիտեի աշխատակից չհանդիսացող անձանց մուտքը վերահսկելի գոտիներ իրականացվել է բացառապես Կոմիտեի նախագահի գիտությամբ եւ թույլտվությամբ՝ ավիացիոն անվտանգության պահանջների համաձայն:

2-րդ հարցի վերաբերյալ հայտնում ենք, որ չենք կարող համաձայնել ձեւակերպմանը, քանի որ այն չի համապատասխանում իրականությանը: Կոմիտեն պատերազմի ընթացքում իր գործառույթներն իրականացրել է ամբողջ ծավալով, ուժերի գերլարումով, մեծ անձնվիրությամբ եւ պատասխանատվությամբ: Այդ ընթացքում իրականացվել են նաեւ ուղեւորատար, բեռնատար, ինչպես նաեւ տարբեր նշանակության այլ թռիչքներ: Ի թիվս Կոմիտեին օրենքով վերապահված այլ գործառույթների, կազմակերպվել եւ իրականացվել են հումանիտար չվերթներ բազմաթիվ երկրներից:

3-րդ հարցի վերաբերյալ հայտնում ենք, որ Հայաստանի Հանրապետությունը երբեւէ ԵՄ ավիացիոն անվտանգության ցուցակում (սեւ ցուցակ) չի եղել: Այնուհանդերձ, եթե Ձեր հարցը վերաբերում է Հայաստանում գրանցված ավիաընկերությունների ԵՄ օդային անվտանգության նորացված ցանկում ներառելու վերաբերյալ Եվրոպական թռիչքային անվտանգության կոմիտեի՝ 2020 թվականի հունիսի 2-ի որոշմանը, ապա տեղեկացնում ենք, որ Կոմիտեն համագործակցում է միջազգային տարբեր ավիացիոն կառույցների հետ՝ ոլորտում կուտակված խնդիրները հաղթահարելու ուղղությամբ:

4-րդ հարցի վերաբերյալ հայտնում ենք, որ «Ryanair» ավիաընկերության կողմից թռիչքների դադարեցումը պայմանավորված է բացառապես Քովիդ-19 համավարակով, ինչը հանգեցրեց մարդկանց տեղաշարժի սահմանափակումներին եւ օդային ուղեւորափոխադրումների կտրուկ կրճատմանը՝ ինչպես մեր տարածաշրջանում, այնպես էլ Եվրամիության տարածքում: Ավիաընկերությունը հայտնել է նաեւ, որ 2020/2021 թթ. ձմեռային նավիգացիոն շրջանում ձեռնպահ է մնում թռիչքներ իրականացնելուց՝ միաժամանակ տեղեկացնելով, որ պատրաստակամ է թռիչքներ իրականացնել՝ համավարակի հետ կապված իրավիճակի բարելավման դեպքում: Նշենք նաեւ, որ համավարակի երկրորդ ալիքի պատճառով Եվրամիության տարածքում սահմանվեցին մուտքի նոր սահմանափակումներ եւ խստացումներ բազմաթիվ երկրների քաղաքացիների համար՝ այլ երկրներում Քովիդ-19 համավարակի տարածման ցուցանիշներից ելնելով:

Այսպիսով, Ռեւազյանը հաստատում է, որ բնակվել է աշխատավայրում: Բացատրությունը, իհարկե, ծիծաղ է առաջացնում՝ «ռազմական դրություն էր»: Այդ դեպքում նա դեռ աշխատավայրո՞ւմ է բնակվում, երեխան էլ հե՞տը: Բայց, շատ ավելի լուրջ է պնդումը, թե սույն Կոմիտեն պատերազմի ժամանակ ինչ-որ դեր է ունեցել: Հայաստան եկել են հատուկենտ ռեյսեր ու հիմնականը՝ ռազմական ուղղվածության, որի հետ քաղավիացիան որեւէ կապ չունի: Այսինքն, թե «աշխատում էին՝ իրենց չխնայելով», իսկ Կոմիտեի պետն էլ անգամ նորածին երեխային էր թողել ու գիշեր-ցերեկ աշխատատեղից չէր շարժվում, պարզապես ծաղր է այդ նույն պահին հայրենիքի համար կյանքը ռազմաճակատում չխնայողների հասցեին: Ավելի լավ կլիներ պարզապես ասեր՝ օդանավակայանում կա ռմբապաստարան, եւ ինքն էլ ընտանյոք հանդերձ մնում էր աշխատավայրում, որ այնտեղ պատսպարվի: Ինչ վերաբերում է մեր իշխանությունների թեթեւ ձեռքով այդքան արտոնություններ ստացած «Ryanair»-ին, ապա փայլուն գործ են գտել: Ծանր օրերին կարելի է Հայաստանից հազարավոր կիլոմետրերով հեռու մնալ, լավ օրերին էլի վազել՝ փող աշխատելու: Ընդգծենք, որ նման ընկերություններին նորմալ երկրները բարեւ անգամ չեն տալիս: Ինչ վերաբերում է «սեւ ցուցակներին, ապա մինչ մեր Քաղավիացիայի վարչությունը «համագործակցում է միջազգային տարբեր ավիացիոն կառույցների հետ», պարզվեց, որ հայկական գրանցումով ինքնաթիռները կարող են օդում «անհետանալ», ու այդ մասին մեր չինովնիկները միայն դրսերից են տեղեկանում: Ամբողջ հարցը սրանից հետո այն է, թե այդ ո՞ր մի լուրջ «միջազգային ավիացիոն կառույցը» ձեր նմանների հետ կհամագործակցի:

ԻԼՈՆԱ ԱԶԱՐՅԱՆ

Այս թեմայով ՔԱՂԱՎԻԱՑԻԱՅԻ ԿՈՄԻՏԵՆ ՆՈՐԻՑ ՏԵՂԵԿԱՏՎՈՒԹՅՈՒՆԸ ԹԱՔՑՆՈՒՄ Է «Մեծ» գործակալի փոքրիկ օգնականները կամ ՍԴ-ի զավթումը. Ռոբերտ Հայրապետյան Հայաստանը պետք է ՌԴ-ի հետ նոր միութենական դաշինք ստեղծի, այլ տարբերակ չկա. Նիկողոսյան Հայրենիքը օրհասական վիճակում է, պետք է անհապաղ ստեղծել «Ազգային փրկության» կոմիտե. ՍԻՄ նախագահի հայտարարությունն Արցախից Մենք միանում ենք հայտարարությանը, աջակցում ենք պահանջներին եւ կիսում գնահատականները. ՍԻՄ նախագահը՝ մեկ տասնյակից ավելի կուսակցությունների հայտարարության մասին