«Նախատեսել ենք մարտի 8-ին բացել «Կինը եւ Նոր Արմավիրի հնագիտական գանձերը» ցուցադրությունը». ՄԻՔԱՅԵԼ ԲԱԴԱԼՅԱՆ

«Իրավունքը» հյուրընկալվել է «Էրեբունի» պատմահնագիտական արգելոց-թանգարան, որտեղ թանգարանի տնօրեն ՄԻՔԱՅԵԼ ԲԱԴԱԼՅԱՆԻ  հետ զրուցեցինք նոր ցուցադրություններից, կրթական ծրագրերց եւ շենքի հետ կապված խնդիրներից:

– Պարոն Բադալյան, թանգարանն այս պահին ի՞նչ ցուցադրություններով է հանդես գալիս:

– Այս պահին թանգարանի ժամանակավոր ցուցադրությունների սրահում ունենք` "Հին Հայաստանի լուռ վկաները. վերածնունդ եւ վերարժեւորում" խորագրով ցուցադրությունը, որը տեւելու է մինչեւ փետրվարի 26-ը:Ներկայացված են շատ հետաքրքիր եւ արժեքավոր քարե եւ մետաղե առարկաներ:

– Ի՞նչ գիտակրթական ծրագրեր եք իրականացնում:

– Ունենք մի շարք գիտակրթական եւ կրթական-ժամանցային ծրագրեր, որոնք վերջին ժամանակահատվածում մեծ պահանջարկ են վայելում: Բացի այդ, նախատեսել ենք տպել  «Ներկիր ինքդ» ձեւաչափով  ալբոմներ, համապատասխանաբար  ուրարտական որմնանկարների գունավոր եւ երեխաների համար` ներկելու համար նախատեսված տարբերակներով: Մեծ թափով հանձն ենք առել մեր գրադարանի համալրման աշխատանքին: Այս առումով դիմել ենք տարբեր կազմակերպությունների, որոնք գրքեր են տրամադրում թանգարանին: Միայն ասեմ, որ վերջին մեկ ամսվա ընթացքում մեր գրադարանը համալրվել է առավել քան 250 միավոր մասնագիտական գրականությամբ: Մեր մյուս կարեւոր ձեռքբերումը ՀՀ ԿԳՄՍ Գիտության պետական կոմիտեի կողմից տրամադրվող ուրարտագիտության սեկտորի զարգացման թեմատիկ ծրագիրն է, որը մեկ տարի ժամկետով իրականացվելու է «Էրեբունի» ՊՀԱԹ-ի կողմց: Ծրագրի ղեկավարն է պ.գ.դ., պրոֆեսոր Աշոտ Փիլիպոսյանը: Այս ծրագրում են ներգրավվելու ինչպես երիտասարդ, այնպես էլ փորձառու հետազոտողներ:  Այս ծրագրի հաջող իրագործումը հնարավորություն է  է տալիս թանգարանի մի շարք աշխատակիցների հավելյալ ֆինանսական միջոցներ ունենալու: Այս ծրագրի շրջանակներում նաեւ ներգրավված  են թանգարանի վերականգնողները: Դիմելու ենք ՀՀ  մարզերի թանգարաններին, որոնք ունեն նախաուրարտական, ուրարտական կամ հետուրարտական ժամանակաշրջանի գտածոներ: Եվ բոլոր մարզային թանգարանների համար մեկ մետաղի իր եւ մեկ խեցեղենի գտածո անվճար վերականգնելու ենք եւ կամ ամրակայելու:

Սկսել ենք մի նոր գիտակրթական նախագիծ, երբ ամեն շաբաթ օր հրավիրում ենք տարբեր ոլորտների հայտնի գիտնականների, որոնք անվճար բաց դասախոսություններ են կարդում տարբեր` խիստ կարեւոր եւ արդիական թեմաների շուրջ: Արդեն հինգ բանախոս հանդես են եկել նման դասախոսություններով: Այս տարի մեր թանգարանում նախատեսել ենք քառասուն նման դասախոսություն ունենալ:

– Իսկ թեմանե՞րը…

– Թեմաները տարբեր են: Օրինակ` ունեցել ենք թեմա` ինչպես գրել գիտական հոդված հնագիտությունից, որը ներկայացրել է Հնագիտության եւ ազգագիտության ինստիտուտի փոխտնօրեն, Թյուրինգենի համալսարանի դոկտոր Արսեն Բոբոխյանը, ռադիոածխածնային հետազոտությունների վերաբերյալ դասախոսությամբ հանդես եկավ հայտնի հնագետ, պ.գ.դ. Ռուբեն Բադալյանը: Այսօր մեր հարեւան երկիրը փորձում է խեղաթյուրել մեր պատմությունը, հատկապես քրիստոնեական ժառանգությունն Արցախի տարածքում փորձում է «աղվանաֆիկացնել»: Եվ այս առումով մենք հրավիրել ենք ոլորտի ճանաչված հետազոտող պ.գ.դ. Ալեքսան Հակոբյանին, որը Աղվանքի շրջանի մասնագետ է եւ շատ հետաքրքիր ուսուցողական դասախոսություն անցկացրեց: Միհրականության մասին հետաքրքիր դասախոսություն ունեցանք: Գիտենք, որ այն դոմինանտ կրոնական համակարգերից մեկն էր Հին աշխարհում: Թեման ուսումնասիրող լավագույն մասնագետը` պ.գ.դ. Երվանդ Մարգարյանը, այդ թեմայով շատ հետաքրքիր դասախոսություն ունեցավ: Վերջին դասախոսության ժամանակ «Էրեբունի» ՊՀԱԹ-ի «Կարմիր բլուր» մասնաճյուղի ղեկավար, ուրարտագետ Վահե Սարգսյանն ուշագրավ անդրադարձ կատարեց  ուրարտագիտության ռահվիրաներից Լեհման-Հաուպտի գործունեությանը:Կարծում եմ` շատ կարեւոր գիտակրթական ծրագիր ենք  այս առումով իրականացնում:

– Իսկ Կարմիր բլուրի հետ կապված ի՞նչ նոր ծրագրեր ունեք:

– Կարմիր բլուրում պետք է երեխաների համար վերգետնյա ուսումնական արհեստական պեղավայրը պատրաստենք:

– Այս պահին, ո՞ր ցուցադրության վրա է թանգարանն աշխատում:

– Հիմա աշխատում ենք նոր, ժամանակավոր ցուցադրության վրա, որը նախատեսել ենք մարտի 8-ին բացել` «Կինը եւ Նոր Արմավիրի հնագիտական գանձերը» թեմայով: Այստեղ առաջին անգամ Էրեբունի թանգարանում ներկայացնելու ենք բազմաթիվ իրեր, որոնք չափազանց կարեւոր արժեք եւ նշանակություն ունեն: Առաջին անգամ ներկայացվելու են ոսկյա իրեր, կցուցադրվեն նաեւ եզակի այլ հնագիտական գտածոներ, որոնք հայտնաբերվել են Նոր Արմավիր գյուղում, հայտնի հնագետ Սիմոն Հմայակյանի կողմից իրականացրած պեղումների ժամանակ:

Ցուցադրությունն իրականացվելու է Երեւանի քաղաքապետարանի աջակցությամբ: Այստեղ նաեւ ներկայացվելու է ուրարտական հանդերձանքով կնոջ իմիտացիոն կերպար` հիմնված լուրջ գիտական վերլուծության վրա: Այցելուները հնարավորություն կունենան նաեւ լուսանկարվել մեր ուրարտուհու հետ: Մարտի վերջին նախատեսում ենք իրականացնել տեսողության խնդիր ունեցողների համար մեծ ցուցադրության բացումը:

– Թանգարանն  ի՞նչ խնդիրներ ունի:

– Դեռեւս խոսեմ դրանցից մեկի մասին: Էրեբունի թանգարանի շենքը գտնվում է բավականին վատ վիճակում: Եվ ճակատային հատվածներում առկա են ճաքեր: Նաեւ ցուցադրությունում մի հատված կա, որտեղից ավազ է լցվում,  ինչը լուրջ մտահոգությունների տեղիք է տալիս: Դիմել ենք Երեւանի փոխքաղաքապետ տիկին Գայանե Մելքոնյանին: Դրանից հետո սկսվել են թանգարանի շենքի հետազոտությունները համապատասխան լիցենզիա ունեցող կազմակերպության կողմից: Հիմա ընթանում են սեյսմիկ հետազոտությունները, որի եզրակացությունը շուտով կիմանանք: Արդեն տեղեկացանք, որ անհրաժեշտ է լինելու իրականացնել երկրաբանական հետազոտություններ, որը հնարավորություն կտա պատկերացում կազմել շենքի վիճակի մասին: Բայց մի բան ակնհայտ է, որ շենքը պետք է ամրակայվի:

ՆՈՒՆԵ ԶԱՔԱՐՅԱՆ

Հ.Գ-Հարցազրույցը  կարդացեք  նաեւ«Իրավունք» թերթի այսօրվա համարում:

Այս թեմայով «ՄԻՈՒԹԵՆԱԿԱՆ ՊԵՏՈՒԹՅԱՆ ԽՆԴԻՐՆ ԱՄԲՈՂՋ ԺՈՂՈՎՈՒՐԴԸ ՊԵՏՔ Է ՈՐՈՇԻ» «ԱՎԱԳԱՆՈՒ «ԻՄ ՔԱՅԼԸ» ԽՄԲԱԿՑՈՒԹՅԱՆ ԱՆԴԱՄՆԵՐԸ ԸՆԴՈՒՆԵՑԻՆ ԿԱՊԻՏՈՒԼՅԱՑԻՈՆ ԿԱՏԱՐՈՂԱԿԱՆ ՓԱՍՏԱԹՈՒՂԹ» Հայկ Մարությանի սիրտն ամերիկացի աշխատակից է ուզում «Տեղի ունեցավ Կինը եւ Արմավիրի հնագիտական գանձերը» խորագրով ցուցահանդեսի բացումը Ովքեր են Հայրենիքը փրկող կապույտ դրոշակավորները