Յուրա Մովսիսյանն ավարտեց ֆուտբոլային կարիերան

Հայաստանի ազգային հավաքականի նախկին ֆուտբոլիստ Յուրա Մովսիսյանն ավարտել է պրոֆեսիոնալ ֆուտբոլիստի կարիերան։

Այս մասին հեռվար կապի միջոցով հայտարարել է անձամբ Մովսիսյանը` Էդգար Մանուչարյանի հաղորդման ժամանակ։

33-ամյա մարզիկը վստահեցրել է, որ ապագայում պլանավորում է ֆուտբոլի հետ կապված գործունեություն ծավալել, սակայն ոչ որպես մարզիչ։

Յուրա Մովսիսյանն իր ակումբային կարիերայի ընթացքում հանդես է եկել «Սպորտինգ Կանզաս-Սիթի» (ԱՄՆ, 2006-2008թթ․), «Սոլթ-Լեյք Սիթի» (2008-2010թթ․, 2016-2018թթ․), «Ռանդերսի» (Դանիա, 2010-2011թթ․), «Կրասնոդարի» (2011-2013թթ․), «Սպարտակ Մոսկվայի» (2013-2016 թթ․), «Յուրգորդենի» (Շվեդիա, 2018թ․ մարտ-հունիս), «Չիկագո Ֆայրի» (2018թ․ սեպտեմբեր – 2019թ․ հունվար) կազմերում։ Հայազգի հարձակվողը 2019 թվականի հունվարից մինչ օրս գտվնում էր ազատ գործակալի կարգավիճակում։

Մովսիսյանն ակումբային կարիերայի ընթացքում մասնակցել է 314 պաշտոնական հանդիպման՝ դառնալով 108 գոլի և 38 գոլային փոխանցման հեղինակ։ Արդեն նախկին ֆուտբոլիստը «Սոլթ-Լեյք Սիթիի» կազմում 2008/09 մրցաշրջանում դարձել է ՄԼՍ-ի չեմպիոն, իսկ 2018թ․ «Յուրգորդենի» հետ նվաճել է Շվեդիայի գավաթը։

Հայաստանի ազգային հավաքականի կազմում Յուրա Մովսիսյանն առաջին պաշտոնական հանդիպումն անցկացրել է 2010 թվականի օգոստոսի 11-ին, երբ մեր ընտրանին սեփական հարկի տակ ընկերական հանդիպման շրջանակում 1։3 հաշվով զիջեց Իրանի հավաքականին։

Ընդհանուր հաշվով ֆուտբոլիստն ազգային հավաքականում մասնակցել է 38 հանդիպման՝ դառնալով 14 գոլի և 12 գոլային փոխանցման հեղինակ։