ԵԹԵ ԽՍՀՄ-Ի ՔԱՐՏԵԶԸ ՈՒՍՈՒՄՆԱՍԻՐՈՒՄ ԵՆՔ, ԱՊԱ ԽՆԴԻՐ ԿԱ. ԿԱՊԱՆԻ ՔԱՂԱՔԱՊԵՏ

Սյունիքում որեւէ բնակավայր վտանգվա՞ծ է ներկա պահին: Հաշվի առնելով այն, որ տարաբնույթ տեղեկություններ կան Ադրբեջանին հավանական անցնող տարածքների վերաբերյալ: Սյունեցիներին մտահոգող հարցերի շուրջ զրուցել ենք Կապանի համայնքապետ ԳԵՎՈՐԳ ՓԱՐՍՅԱՆԻ հետ, ով անդրադառնալով վերը նշված խնդրին` նախ փաստեց.

- Այս պահին մեզ ոչ ոք նման բան չի տեղեկացրել: Հիմա մենք կանգնած ենք այնտեղ, որտեղ մինչեւ ամսի 10-ը կանգնած էինք: Մնացածն արդեն հետագայի հարց է, չգիտեմ, թե ի՞նչ բանակցություններ կլինեն, ի՞նչ կանեն դիվանագետները: Այս պահին կառավարության հետ նման քննարկումներ չեն եղել, բայց հուսով եմ, որ կլինեն:

- Այսինքն` չե՞ք բացառում, որ հետագայում խնդիրներ կարող են առաջանալ:

– Ըստ էության, ոչինչ չեմ բացառում: Բայց ինչպես ասացի, մեզ հետ որեւէ մեկը այդ հարցով որեւէ քննարկում չի իրականացրել:

- Տեղեկություններ կան, որ հիմք են ընդունվում ԽՍՀՄ սահմանները: ԽՍՀՄ սահմանները հասնո՞ւմ են մինչեւ Կապան:

- Եթե ԽՍՀՄ-ի քարտեզը ուսումնասիրում ենք, ապա խնդիր կա, այո, եւ բավականին լուրջ է այդ խնդիրը: Եթե ԽՍՀՄ սահմաններով վերցնենք, ապա,  մոտենում են քաղաքին, ինչը բավականին լուրջ խնդիր է:

- Եթե այդ խնդիրները գործնականում իրագործվեն, ո՞րն է լինելու, որպես քաղաքապետ, Ձեր քայլը:

- Մեծ հույս ունեմ, որ մեր կառավարությունը այդքան ապիկար չի լինի, որ բանակցությունների արդյունքում հասցնի մեզ այդ լուծմանը: Առիթից օգտվելով` ուզում  եմ փաստել, որ Կապանի բնակիչների մոտ  կա ընդամենը մտահոգություն, բայց ոչ խուճապ:

ԻԼՈՆԱ ԱԶԱՐՅԱՆ

Այս թեմայով ՈՂՋ ՍՅՈՒՆԻՔՈՒՄ ՆՈՒՅՆ ՄՏԱՀՈԳՈՒԹՅՈՒՆՆԵՐՆ ՈՒ ՎԱԽԵՐՆ ԵՆ «ԶԱՐԳԱՑՈՒՄՆԵՐԸ ՏԱՆՈՒՄ ԵՆ ՆՐԱՆ, ՈՐ ԱՄԲՈՂՋ ԵՐԿՐՈՒՄ ՀԱՐՈՒՑՎԵՆ ՆԵՐՔԻՆ ԽԺԴԺՈՒԹՅՈՒՆՆԵՐ» Փաշինյանը զբաղված է տնաքանդությամբ, սա էր իր «ավանդը» պետականաշինության գործում. Պետրոսյան Առաջին դավաճանը վարչապետի աթոռը զբաղեցրած խեղկատակն է. Գեւորգ Գեւորգյան Երեք կուսակցության ստեղծած «Համահայկական ազգային համաձայնությունը» ճաք տվեց