Մեղավորների շարքում առաջիններից մեկը ՀՀ նախագահն է. Մելիք-Շահնազարյան

Թեպետ շարունակվում է գնալով ընդլայնվել վարչապետ Նիկոլ Փաշինյանի հրաժարականի հանրային պահանջը, սակայն նա, կարծես թե, որեւէ կերպ չի պատրաստվում բաժանվել կառավարության ղեկավարի աթոռից: Ավելին` նա փոփոխություններ է կատարում կառավարության կազմում` փորձելով ժամանակ շահել: Այս մասին «Իրավունքը» զրուցեց «Ոսկանապատ» վերլուծական կենտրոնի ղեկավար, քաղաքագետ ՀՐԱՆՏ ՄԵԼԻՔ-ՇԱՀՆԱԶԱՐՅԱՆԻ հետ:

«ՆԻԿՈԼ ՓԱՇԻՆՅԱՆԸ ՉԻ ՊԱՏԿԵՐԱՑՆՈՒՄ ՈՂԲԵՐԳՈՒԹՅԱՆ ՄԱՍՇՏԱԲՆԵՐԸ»

– Պարոն Մելիք-Շահնազարյան, ըստ էության, Նիկոլ Փաշինյանը չի պատրաստվում հեռանալ կառավարությունից: Ի՞նչ հետեւանքներ կարող է սա ունենալ:

– Նիկոլ Փաշինյանը չի պատկերացնում իրավիճակը եւ այն ողբերգության մասշտաբները, որ ստեղծվել են հայկական երկու պետություններում եւ հայ ժողովրդի սրտում: Սա է պատճառը, որ նա շարունակում է անել քայլեր, որոնք չեն բխում իրավիճակից եւ, ըստ էության, ավելի են բարդացնում իր վիճակը: Մեր ժողովովրդի ուղերձն այսօր շատ պարզ է` Նիկոլ Փաշինյա՛ն, քեզ հետ ոչ մի մետր ճանապարհ գնալու որեւէ ցանկություն չունենք: Ստեղծված իրավիճակից դուրս գալու համար մեզ պետք է միանգամայն այլ առաջնորդ, որը կստեղծի ագգային միասնություն: Մեզ պետք են մարդիկ, ովքեր հավատում են մեր ժողովրդի պոտենցիալին, կարողություններին եւ այդ ամենը հաշվի առնելով կարող են գծել ճանապարհային քարտեզներ, որոնք կյանքի կոչելով` կարող ենք դուրս գալ ստեղծված աղետալի վիճակից: Մեզ պետք չեն մարդիկ, ովքեր չոքում են թշնամու առջեւ եւ «կոշիկները լպստելով» կապիտուլիացիոն պայմանագրեր են ստորագրում:

«ՎԵՐ ԿԱՑԵՔ ԵՎ ԳՆԱՑԵ՛Ք, ՄԻ՛ ՎԱՏԱՑՐԵՔ ԻՐԱՎԻՃԱԿՆ ԱՎԵԼԻ»

– Ի դեպ, կարծես թե, լեզու չեն գտնում իշխանավորները նաեւ սեփական թիմում: Նկատելի է ԱԺ «Իմ քայլը» խմբակցության պատգամավորների եւ կառավարության անդամների միջեւ առկա լարվածություն: Ի՞նչ եք կարծում` կհաջողվի մի քանի նախարարի փոփոխությունը ներկայացնել` իբրեւ փոխզիջումային տարբերակ, որը կարող է ընդդիմությանը հետ պահել վարչապետի հրաժարականի պահանջից:

– Նախորդ շաբաթ նայում էի Ազգային ժողովում կառավարության հետ հարց ու պատասխանը: Կոպիտ պետք է ասեմ, բայց բոլորը մեռած էին, թաղած չէին: Իրար ո՛չ հարց ունեն տալու, ո՛չ էլ հարցերին պատասխանելու հնարավորություն ունեին: Օրինակ` ԱԺ պատգամավոր Թագուհի Թովմասյանը շատ պարզ հարց էր տալիս, թե ի՞նչ է լինելու Սոթքի ոսկու հանքերի հետ, ի՞նչ է լինելու աշխատակիցների ճակատագիրը, կարողանալո՞ւ են նրանք աշխատել: Իսկ կառավարությունում իրար երեսի էին նայում եւ չէին կարողանում պատասխանել: Բազում նման հարցեր կան, որոնց պատասխանները ցանկանում  է լսել այսօր ժողովուրդը, բայց այդ հարցերին ո՛չ կառավարությունը, ո՛չ էլ խորհրդարանական մեծամասնությունը չի կարող պատասխանել: Դրա համար էլ արդեն տեւական ժամանակ է իրենց շատ բարի առաջարկ է հղվում հանրության կողմից` վեր կացեք եւ գնացե՛ք, մի՛ վատացրեք իրավիճակն ավելի, քան կա: Բայց, ինչպես երեւում է, հասկանալու, իրավիճակը գնահատելու հետ լուրջ խնդիրներ ունեն: Նրանք իսկապես կտրված են իրականությունից եւ մինչեւ հիմա մտածում են ոչ թե պետության, այլ սեփական ճակատագրերի մասին:

– Չե՞ք կարծում, որ ստեղծված իրավիճակում իր մեղքի բաժինն ունի նաեւ ՀՀ նախագահ Արմեն Սարգսյանը, ով պատերազմից հետո հայտարարեց, թե իբր մամուլից է իմացել զիջումների վերաբերյալ Ն. Փաշինյանի ստորագրության մասին:

– ՀՀ նախագահը պետության անվտանգության եւ նաեւ տարածքային ամբողջականության երաշխավորն է: Իհարկե, ոմանք հիմա կսկսեն փորձել բացատրություններ տալ, թե Արցախը Հայաստանի Հանրապետություն չէ եւ այլն, բայց պետք է ասեմ, որ ցանկացած մեկը, ով ունեցել է պատասխանատվություն` կանխելու այս ողբերգությունը եւ չի գործել իր պատասխանատվության սահմաններում, իհարկե, մեղավոր է: Եվ ՀՀ նախագահն այդ մեղավորների շարքում առաջիններից մեկն է:

«ԱՅՍ ԱԼԻՔԸ ԳՆԱԼՈՎ ՄԵԾԱՆԱԼՈՒ Է, ՀԻՄՆԱՎՈՐ ՈՒ ԻՄԱՍՏԱՎՈՐՎԱԾ Է ԴԱՌՆԱԼՈՒ»

– Այս օրերին տարբեր ընդդիմադիր քաղաքական գործիչների նկատմամբ սկսել են քրեական մեղադրանքներ առաջադրել: Այս կերպ հնարավոր կլինի՞ լռեցնել բոլորին:

– Կարծում եմ` մեր հանրությունը դեռ նոր սկսում է գիտակցել, թե ինչ է տեղի ունեցել: Իրականում շատ մեծ է ցավը, ինքս, լինելով իմ ընկերների, ընկերների զավակների հոգեհանգստին, ինչ-որ պահի մտածում եմ` երեւի թե, ժամանակ է պետք ուշքի գալու համար եւ գիտակցելու, թե ինչ է տեղի ունենում: Նույնիսկ ինձ այդ ժամանակը պետք է, դրա համար չեմ կարծում, որ ճնշումներով կարողանալու են լռեցնել: Այս ալիքը գնալով մեծանալու է, հիմնավոր ու իմաստավորված է դառնալու ամեն քաղաքացու համար: Եվ, անկեղծ ասած, քաղաքական գործիչների ճակատագրերն էլ այս պահին ինձ այդքան հետաքրքիր չեն, պետք է բոլորս մտածենք մեր պետության եւ մեր հայրենիքի անվտանգության մասին: Ըստ իս, դեռ շանսեր ունենք ինչ-որ բաներ շտկել Արցախում` լինի քաղաքական գործիչների միջոցով, թե` հանրային ալիքի, ինչն էլ կբերի նոր առաջնորդներ, նոր մոտեցումներ: Այս պահին, հենց այս վայրկյանին առաջին խնդիրը Նիկոլ Փաշինյանի հեռացումը պետք է լինի, հետո արդեն կտեսնենք, թե զարգացումներն ինչ ընթացք կունենան: Ավելին ասեմ` անգամ եթե «Իմ քայլից» լինի վարչապետի նոր թեկնածու, ես դեմ չեմ լինի, որովհետեւ հիմա բոլոր խնդիրների պատճառն անձամբ Նիկոլ Փաշինյանն է:

ՀՐԱՆՏ ՍԱՐԱՖՅԱՆ

Այս թեմայով Նիկո՛լ, հենց գերիները վերադառնան, պարզ կլինի՝ քանի երեխա ես ուղարկել մսաղաց. Մարտոյան ՄԱՐՏԱԿԱՆ ԳՈՐԾՈՂՈՒԹՅՈՒՆՆԵՐԸ ԿԱՐՈՂ ԷԻՆ ՇԱՐՈՒՆԱԿՎԵԼ, ՊԱՐԶԱՊԵՍ ՊԵՏՔ ԷՐ ՃԻՇՏ ՎԵՐԱԽՄԲԱՎՈՐՈՒՄՆԵՐ. ՍԵՅՐԱՆ ՕՀԱՆՅԱՆ «ՇՈՒՏՈՎ ԱԿԱՆԱՏԵՍ ԵՆՔ ԼԻՆԵԼՈՒ ՀՍԿԱՅԱԿԱՆ ԳՈՐԾԱԿԱԼԱԿԱՆ ՑԱՆՑԻ ԲԱՑԱՀԱՅՏՄԱՆ» Շուտով ականատես ենք լինելու գործակալական ցանցի բացահայտման. Արա Վարդանյան «ՍԱ ՆՅԱՐԴԵՐԻ ՊԱՅՔԱՐ Է, ՈՐՏԵՂ ՅՈՒՐԱՔԱՆՉՅՈՒՐԸ ՍՊԱՍՈՒՄ Է, ԹԵ ՈՐ ԿՈՂՄՆ Է ՍԽԱԼՎԵԼՈՒ»