Մոսկվայի օրվան նվիրված համերգ Երևանում՝ հայ և ռուս երգիչների մասնակցությամբ

Շոու բիզնես 4 Սեպտեմբեր, 2020 10:42

Սեպտեմբերի 5-ին և 6-ին հայ և ռուս հայտնիների մասնակցությամբ տեղի կունենան համերգներ նվիրված Մոսկվայի 873-րդ տարեդարձին։ Մոսկվայի օրվա առթիվ Երևանում «Դոմ Մոսկվի» մոսկովյան մշակութագործարարական կենտրոնն ամեն տարի կազմակերպում է տոնական միջոցառումներ։ Այս տարի միջոցառումները տեղափոխվել են օնլայն հարթակ՝ պայմանավորված համավարակով։

Համերգին կմասնակցեն Մարիամ Մեհրաբովան, Մարգարիտա Պոզոյանը, Օլեգ Պոգուդինը, Սոնան, Հայկոն, Էրիկ Կարապետյանը, Անգելինա Կապլանը, Ալլա Լևոնյանը և այլք: Նրանք կներկայացնեն ստեղծագործություններ նվիրված Երևանին և Մոսկվային։ Նախատեսվում է նաև մանկական համերգ, որի ժամանակ կատարումներով կներկայանան Նաիրա Գյուրջինյանի անսամբլը և, Բորիս Անահիտ Ադամյանները, Արսեն Գրիգորյանի ստուդիայի փոքրիկները, Միշան ու այլք:

Տոնական օրերի մյուս համերգին անդրադարձ կլինի խորհրդային ֆիլմերից հարազատ դարձած երգերին։ «Արտսինեմա» անսամբլը կհնչեցնի երգեր «Ճանապարհ դեպի կրկես», «Ծառայողական սիրավեպ», «Ճակատագրի հեգնանքը» ու այլ ֆիլմերից։

«Թեև այս տարի միջոցառումները տեղափոխեցինք օնլայն հարթակ, մասշտաբայնությամբ դրանք չեն զիջում նախորդ տարիներին։ Իսկապես հագեցած մշակութային ծրագիր ենք պատրաստել։ Կարծում ենք՝ կկարողանանք իսկական տոն կազմակերպել մեր հայրենակիցների համար։ Նրանք կվերհիշեն իրենց սիրելի ֆիլմերից արդեն հարազատ դարձած մեղեդիները, կվայելեն էստադրային համերգ, փոքրիկներն էլ կունկնդրեն իրենց տաղանդավոր սերնդակիցներին։ Մոսկվան ու Երևանը միավորում է ընդհանուր, բազմադարյա եղբայրական, գործընկերային հարաբերությունների պատմությունը, հոգևոր մտերմությունը, միմյանց ավանդույթների ու սովորույթների նկատմամբ անկեղծ հետաքրքրությունը: Այսօր նույնպես երկու երկրները շարունակում են զարգացնել ու ամրապնդել բազմակողմանի գործընկերային հարաբերությունները։ Այս միջոցառումները այդ ամենի ապացույցն են», - Զրույցում ասաց Երևանում «Դոմ Մոսկվի» կենտրոնի տնօրեն Վահրամ Կարապետյանը։

Նա հայտնեց, որ տոնական համերգներից բացի «Դոմ Մոսկվի» կոնտրոնը կիրականացնի շախմատի և շաշկիի մրցաշարեր, վիդեոէքսկուրսիաներ Ազգային պատկերասրահի ռուսական ավանգարդ սրահներից, նախատեսվում է նաև Ավետիք Իսահակյանի անվան գրադարանում Ռուսական կենտրոնի բացում և դասագրքերի փոխանցում հայկական դպրոցների ռուսական բաժիններին։

Վահրամ Կարապետյանը նկատեց, որ մոսկովյան մշակութագործարարական կենտրոնը իր բոլոր միջոցառումները տեղափոխել է առցանց հարթակ և շարունակում է ուրախացնել իր հանդիսատեսին մշակութային ու լուսավորչական տարբեր նախագծերով. «Կենտրոնի էջերում անցկացվում են առցանց համերգներ, դասախոսություններ, վիրտուալ էքսկուրսիաներ, ցուցադրություններ, որոնք ներկայացնում են ռուս և հայ ժողովուրդների հարուստ մշակույթը»։