ԵՊՀ հոգաբարձուների խորհուրդը ԶԼՄ-ներին թույլ չտվեց լուսաբանել նիստը, դեմ են նաև ԿԳՄՍ փոխնախարարն ու փոխվարչապետի գրասենյակի ղեկավարը

Լրագրողներին թույլ չտվեցին լուսաբանել Երևանի պետական համալսարանի հոգաբարձուների խորհրդի նիստը, որը մեկնարկել է այսօր ժամը 11:00-ից:

ԵՊՀ հոգաբարձուների խորհրդի նախկին նախագահ, այժմ՝ անդամ Գևորգ Մուրադյանը, համալսարանի մամուլի քարտուղար Գևորգ Էմին-Տերյանի տեղեկացմամբ, հաստատության անվտանգության աշխատակիցներին հանձնարարել է թույլ չտալ լրագրողների մուտքը՝ որպես հիմնավորում ներկայացնելով պարետի այն որոշումը, որ մի տարածքում 40 անձից ավելի գտնվել չի կարող:

Նշենք միայն, որ Հոգաբարձուների խորհուրդը կազմված է 32 անդամից:

Հավելենք, որ Գևորգ Էմին-Տերյանը քիչ առաջ ֆեյսբուքան գրառում է կատարել՝ տեղեկացնելով, որ ԿԳՄՍ փոխնախարար Ժաննա Անդրեասյանը և ՀՀ փոխվարչապետ Տիգրան Ավինյանի գրասենյակի ղեկավար Վարագ Սիսեռյանը դեմ են, որ լրագրողներին ներս թողնեն:

Ավելի ուշ առաջարկվել է, որ լրատվամիջոցներից միայն մեկին տրվի լուսաբանման թույլտվություն, սակայն ԶԼՄ-ները մերժել են առաջարկը, արդյունքում նիստը չի լուսաբանվում:

Հիշեցնենք, որ սա նոր կազմով Հոգաբարձուների խորհրդի անդրանիկ նիստն է: Օրակարգային առաջին հարցով նախատեսված է «Երևանի պետական համալսարան» հիմնադրամի հոգաբարձուների խորհրդի նախագահի, իսկ երկրորդ հարցով՝ քարտուղարի ընտրությունը։ Օրակարգային երրորդ հարցի ընթացքում Հոգաբարձուների խորհուրդը քննարկելու է «Երևանի պետական համալսարան» հիմնադրամի և «Երևանի պետական համալսարան» հիմնադրամի Իջևանի մասնաճյուղի տնօրենի մրցույթների գործընթացները։

Հիշեցնենք նաև, որ 2019 թ․ մայիսի 23-ից Արամ Սիմոնյանի՝ ԵՊՀ ռեկտորի պաշտոնից հրաժարականից հետո ռեկտորի ժամանակավոր պաշտոնակատար էր նշանակվել Գեղամ Գևորգյանը։ 2020 թ․ մարտի 23-ին նախատեսված ԵՊՀ ռեկտորի ընտրությունը հետաձգվել է անորոշ ժամանակով՝ պայմանավորված ՀՀ տարածքում արտակարգ դրություն հայտարարելու որոշմամբ։

Այս թեմայով Ցավալի է, որ գիտնականի կողմից հնչեցված խոսքը փաստերի խեղաթյուրում է պարունակում. Տեր Մովսես Այլասերված պոռնոդերասանը թիկնապահներով դպրոցում է (տեսանյութ) Այս դասագրքերով դաստիարակում են մի սերունդ, որը պետք է ստրուկի պես ծառայի թուրքին. Պետրոսյան Ինչպես է Նիկոլը կոռուպցիան օգտագործում իշխանությունը պահելու համար․ Հայկ Բաբուխանյան Հրաժարական չտված ԿԳՄՍ նախարարն «արժանացավ» «Դդմիկ» կոչմանը