15-ամյա ծառն արմատախիլ է արվում պետականորեն` ԿԳՄՍՆ-ի կողմից. մանկավարժ

«Պարադիգմա կրթական հիմնադրամի» կազմակերպած մեկշաբաթյա առցանց համաժողովի հերթական քննարկման ժամանակ ՀՀ ԿԳՄՍ նախարարի տեղակալ Ժաննա Անդրեասյանը անդրադարձել է կրթական նոր չափորոշիչից եւ ծրագրերից «Հայ Եկեղեցու պատմություն» առարկայի դուրս բերման որոշմանը։ Անդրադառնալով վերոնշյալին` «Հայ Եկեղեցու պատմություն» առարկա դասավանդած ուսուցչուհի ԳԱՅԱՆԵ ՄԱՆՈՒԿՅԱՆԸ գրում է. «2020- ին «Հայ Եկեղեցու պատմություն» առարկան դառնում է 15 տարեկան. մի առողջ, պտղավետ, շողշողուն ծառ, որ 15 տարի հոգատարությամբ խնամվել եւ աճեցվել է հանրակրթության անդաստանում հայ Պետության եւ Եկեղեցու ձեռքով, դարձել սովորողների, ծնողների եւ դասավանդողների համար սիրելի առարկա` մյուս առարկաների շարքում։ Այսօր այդ 15-ամյա ծառն արմատախիլ է արվում պետականորեն` ԿԳՄՍՆ-ի կողմից` զարմանալի արհամարհանքով, առանց բացատրության եւ հիմնավորման։ Վիրավորված եւ արհամարհված եմ զգում որպես մարդ, քաղաքացի, որպես հայ- քրիստոնյա, որպես նախկինում` առաջին օրվանից ՀԵՊ դասավանդած ուսուցիչ, առարկայի պատասխանատու... Բնության մեջ մի դալար ծառ հատելը պետության հայացքից չի վրիպում` առանց բնապահպանական աղմուկ առաջացնելու, ապա ինչ որակել հանրակրթական էկոլոգիայի մեջ առողջ թթվածին, ճաշակ եւ սնունդ, պաշտպանունակություն մատակարարող այս աղբյուրի ցամաքեցնումը։ Եվ սա` առարկայի հոբելյանական տարում. ցնծացե՛ք, պարոնա՛յք, երեւի ձեր ուրախությունն ու հաղթանակը կրկնապատկվեց։ Ցնծալուց հետո ջանացեք հիմնավորել ձեր որոշումը մեր պետականության, հայ աշակերտի, ուսուցչի, ծնողների, հոգեւորականների...ժողովրդի առաջ։ Իսկ ում համար թանկ է ՀԵՊ առարկան (իսկ դա ջախջախիչ մեծամասնություն է), կարող են բազմաձայն մաղթանքներով շնորհավորել իրար, որովհետեւ այս առարկան դպրոցում հայտնվել է Պետության եւ Հայ Առաքելական եկեղեցու ձեռքսեղմումից, երբ համաճարակ չկար, իսկ հայ ժողովրդի պատմության մեջ նմանօրինակ հազվագյուտ եւ սքանչելի դաշինքից միայն Ոսկե դարեր են ծնվում։ Հույս ունեմ` նախագիծը կսրբագրվի, իսկ իրական, հիմնարար ԱՐԺԵՔԸ կհարատեւի»։