Ինչու է ՀՀ-ում Իրանի դեսպանը հանդիպել զինված խմբավորման կարկառուն աջակիցների հետ
Արխիվ 16-20«Սասնա ծռեր» զինված խմբավորման կարկառուն աջակիցները, որոնք հիմա էլ «ծռերի» հետ միասին հանդես են գալիս, իբրեւ «Ազգային-ժողովրդավարական բեւեռ» նախաձեռնող խումբ, օրերս հանդիպում են ունեցել ՀՀ-ում Իրանի Իսլամական Հանրապետության արտակարգ եւ լիազոր դեսպան Աբբաս Զոհուրիի եւ այլ պատասխանատու դիվանագետների հետ: Թե ի՞նչը կարող էր պատճառ դառնալ Հայաստանում Իրանի դիվանագիտության պատասխանատուի եւ ահաբեկչական անցյալ ունեցողների հետ ասոցացվողների հանդիպման համար, «Իրավունքը» պարզեց Իրանի հարցերով փորձագետ, քաղաքագետ ՌՈԲԵՐՏ ՄԱՐԳԱՐՅԱՆԻ տեսակետը:
-Ինչպես պարզ է դառնում «Ազգային-ժողովրդավարական բեւեռ» նախաձեռնող խմբի տարածած հայտարարությունից, հանդիպումը կայացել է հիշյալ խմբավորման նախաձեռնությամբ, ինչն ընդառաջվել է Իրանի դեսպանատան կողմից: Կարծում եմ` այս հանդիպման մեջ որեւէ քաղաքական ենթատեքստ չպիտի որոնել: Եթե հիշում եք, շուրջ մեկ տարի առաջ էլ Իրանի դեսպանատան ներկայացուցիչներն այցելեցին ՎԵՏՕ շարժման գրասենյակ: Ինչ վերաբերում է հիշյալ խմբավորման որոշ անդամների անցյալի գործունեությանը, պիտի նկատի առնել, որ հանդիպումը կայացել է ոչ թե «Սասնա ծռեր համահայկական շարժման», այլ` «Ազգային-ժողովրդավարական բեւեռ» նախաձեռնող խմբի հետ, իսկ հանդիպմանը մասնակցել են ոչ թե ահաբեկչության մեջ մեղադրվողները, այլ, ասենք, Արա Պապյանը, որը դիվանագետի ու դեսպանի կոչում ունի եւ եղել է Իրան գործուղված դիվանագիտական առաջին կազմի անդամ ու 1992-1993 թթ.-ին ծառայել է Իրանում Հայաստանի դեսպանատանը, իսկ այնուհետեւ 1994-1995 թթ.-ին եղել է ՀՀ ԱԳ նախարարության Իրանի բաժնի վարիչը: Գարեգին Չուգասզյանն էլ արմատներով կապված է Իրանի հետ: Նրա հայրը` արեւելագետ Բաբկեն Չուգասզյանը, ծնունդով իրանահայ է եւ ծնվել է Իրանի Թավրիզ քաղաքում: Չեմ կասկածում, որ Իրանի դեսպանատունը կընդառաջի Հայաստանի քաղաքական դաշտում ակտիվ քաղաքական տարբեր, այդ թվում նաեւ ընդդիմադիր կուսակցությունների եւ ուժերի հետ հանդիպման առաջարկը: Միեւնույն ժամանակ, լրատվամիջոցներից մեկի միջոցով կատարված լրատվության մեջ հետաքրքիր մի արձանագրում կա այն մասին, որ հանդիպման ժամանակ «դժգոհություններ են ներկայացվել Հայաստանում առկա իրավիճակի հետ կապված», ինչը, իհարկե, հերքել է նախաձեռնության անդամ Գարեգին Չուգասզյանը:
ՀՐԱՆՏ ՍԱՐԱՖՅԱՆ