Հեղափոխության հետ կապված խնդիրներ կան, փոխանակ դրա մասին խոսեն, հարցերը տեղափոխում են անձնական դաշտ. Քրիստ Մարուքյան
Արխիվ 16-20Մամուլում տարածված տեղեկությունների համաձայն` ԱԺ «Լուսավոր Հայաստան» խմբակցության ղեկավար Էդմոն Մարուքյանի եղբոր` Էդգար Մարուքյանի հասցեում` Երեւանի բազմաբնակարան շենքերից մեկի մուտքի մոտ, արդեն մի քանի օր է, ինչ ոստիկաններ են հերթապահում: Տեղեկություններ կան, որ ոստիկանությունն օպերատիվ տվյալներ է ձեռք բերել, թե Մարուքյանի եղբոր նկատմամբ հաշվեհարդար է ծրագրվում` ԱԺ հայտնի ծեծկռտուքից հետո նրա գրառման համար: Այս մասին «Իրավունքը» փորձեց մանրամասներ պարզել էդմոն Մարուքյանի մյուս եղբորից` Վանաձորի ավագանու անդամ ՔՐԻՍՏ ՄԱՐՈՒՔՅԱՆԻՑ:
«ԻՆՉ ՈՐ ԱՍՎԵԼ Է ՀՐԱՊԱՐԱԿԱՅԻՆ, ԴԱ Է, ՆՈՐՈՒԹՅՈՒՆ ՉԿԱ»
– Պարոն Մարուքյան, որքանո՞վ է իրականությանը համապատասխանում մամուլում հայտնված տեղեկությունը, եւ ընդհանրապես` ինչպե՞ս եք վերաբերվում ԱԺ-ում տեղի ունեցած միջադեպին ու դրան հաջորդած հայտարարություններին:
– Ես այդ առումով մեկնաբանություն չունեմ: Ինչ որ ասվել է հրապարակային, դա է, նորություն չկա: Ավելի լավ կլինի այդ հրապարակային արված հայտարարություններից ելնելով` անեք դատողություններ, ոչ թե այլ բան ման գաք:
– Ամեն դեպքում, Սասուն Միքայելյանը Ձեր պատգամավոր եղբորը` Էդմոն Մարուքյանին, սպառնում էր «վիզը կտրել», «գլուխը ցխել», իսկ մյուս եղբորը` Էդգար Մարուքյանին ակնարկում, թե հաշվեհարդար կարող են տեսնել նրանից իր հասցեին արված գրառման համար: Ի՞նչ եք կարծում` Ձեր եղբայրներին վտանգ սպառնո՞ւմ է: Մտահոգվա՞ծ եք նրանց անվտանգությամբ:
– Տեղի ունեցածը պետք է դիտարկել զուտ քաղաքական տիրույթում, այլ մեկնաբանություն չունեմ:
– Առհասարակ` որեւէ մեկը որեւիցե մեկից ներողություն խնդրելու անհրաժեշտություն տեսնո՞ւմ եք, թե խնդիրն այլեւս իրավական տիրույթում է, քանի որ Էդգար Մարուքյանը դիմել է ՀՀ գլխավոր դատախազին` Սասուն Միքայելյանի կողմից հնչեցված ուղղակի եւ անուղղակի սպառնալիքների կապակցությամբ հաղորդում ներկայացնելով:
– Դուք ամեն ինչից տեղյակ եք, դրան ավելացնելու բան չունեմ:
«ԲՈՎԱՆԴԱԿՈՒԹՅՈՒՆԻՑ ՇԵՂՎՈՒՄ ԵՆ»
– Իսկ Վանաձորում քաղաքական ի՞նչ տրամադրություններ կան արտակարգ իրավիճակի այս օրերին, իշխանությունից դժգոհ «հակահեղափոխականները» շա՞տ են:
– Ճիշտն ասած, ավելի կարանտինային վիճակ է, մարդկանց հետ շատ չեմ շփվել, դրա համար որեւէ բան չեմ կարող ասել` ընդհանուր տրամադրությունների առումով: «Հակահեղափոխականները» չգիտեմ, սա ձեւակերպումների հարց է, բայց առկա խնդիրների մասին խոսելու անհրաժեշտություն կա: Մինչդեռ, երբ մեկը ինչ-որ քննադատական խոսք է ասում, փոխանակ բովանդակային քննարկման վերածվի, հասկանան` որտեղ է խնդիրը, վերածվում է պիտակավորման, կամ ասում են` նախկիններ, հաջորդներ, չգիտեմ ինչեր: Բայց չէ՞ որ այդ խնդիրները պետք է չլինեին հեղափոխությունից հետո: Իսկ եթե դրանք կան, նշանակում է, որ այդ հեղափոխության հետ կապված ինչ-որ խնդիրներ կան, ու փոխանակ դրա մասին խոսեն` բովանդակությունից շեղվում են ու անցնում նախկիներին, մնացածին ու հարցերը տեղափոխում են անձնական դաշտ:
– Ըստ Ձեզ` ո՞րն է լուծումը ստեղծված իրավիճակում, ԱԺ «Լուսավոր Հայաստան» խմբակցությունը տեղի ունեցած միջադեպից հետո դեռ չի վերադարձել ԱԺ նիստերի դահլիճ:
– Այս պահին այն կարգավիճակում չեմ, որ լուծման մասին խոսեմ, լավ կլինի, որ դրա մասին խոսեք կուսակցության ղեկավարի հետ: Այդպես ավելի ճիշտ կլինի:
– Որպես եղբայր, ի՞նչ եք հորդորել Էդմոն Մարուքյանին:
– Որպես եղբայր` մենք մեր ներսում մեր հորդորները հղում ենք, դա հրապարակային քննարկելու թեմա չէ:
ՀՐԱՆՏ ՍԱՐԱՖՅԱՆ