Ոստիկանի սպանության մեջ մեղադրվող 16-ամյա պատանին տեղափոխվել է հոգեբուժարան

Ոստիկանի սպանության մեջ մեղադրվող 16-ամյա Հրաչը տեղափոխվել է հոգեբուժական հաստատություն՝ դատահոգեբանական-դատահոգեբուժական համալիր փորձաքննության։ Այս մասին «Փաստինֆո»-ի հետ զրույցում ասաց նրա պաշտպան Սեդրակ Մկրտչյանը։ Վերջինիս փոխանցմամբ՝ փորձաքննության արդյունքում միայն պարզ կլինի՝ տղան մեղսունակ է, թե ոչ։

«Եթե փորձաքննական մարմինը եզրակացություն կտա, որ արարքը կատարելու պահին անձը չի գիտակցել իր արարքների բնույթը և հետևանքները, հետևաբար կճանաչվի անմեղսունակ։ Եթե պարզվի, որ գիտակցել է՝ կճանաչվի մեղսունակ , իսկ, եթե պարզվի, որ սահմանափակ է գիտակցել, ապա կճանաչվի սահմանափակ մեղսունակ»,- ասաց պաշտպանը։ Նրա խոսքով՝ գործնականում եզրակացությունը տրվում է փորձաքննության ավարտից երկշաբաթյա ժամկետում, սակայն փորձաքննության համար ժամկետներ չեն նշվում։ «Փորձաքննական մարմինն է որոշում, թե փորձաքննությունն ինչքան ժամանակում կիրականացվի»,- ասաց Մկրտչյանը։

Հիշեցնենք, որ հոկտեմբերի լույս 16-ի գիշերը իր ծառայողական պարտականությունները կատարելիս սպանվել է ոստիկանության Արաբկիրի բաժնի ոստիկան, 38-ամյա Տիգրան Առաքելյանը։ Նախնական քննության տվյալներով՝ ժամը 04:30-ի սահմաններում, պետական պահպանության գլխավոր վարչության Արաբկիրի պահպանության բաժնի ոստիկանները «Հաղթանակ» զբոսայգու մուտքի մոտ նկատել են երկու անձի։ Վերջիններս տեսնելով պարեկային մեքենան փախել են։ Ոստիկանության ծառայողները հետապնդել են նրանց և ազատության պողոտայում բռնել։ Բռնված անձինք դիմադրել են, որի ժամանակ նրանցից մեկը խլել է ոստիկաններից մեկի հաշվեցուցակային ատրճանակն ու կրակել, որի հետևանքով Արաբկիրի պահպանության բաժնի ոստիկան, 38-ամյա Տիգրան Առաքելյանը մահացել է։

Դեպքի առթիվ հարուցվել է քրեական գործ՝ ՀՀ քրեական օրենսգրքի 238-րդ հոդվածի 1-ին մասով, 316-րդ հոդվածի 2-րդ մասով և 104-րդ հոդվածի 1-ին մասով: Քննությամբ պարզվել է առերեւույթ հանցագործություն կատարած անձանց ինքնությունը, որոնք եղբայրներ են՝ ծնված 2003 եւ 2001 թվականին։

Քննչական կոմիտեի պաշտոնական հաղորդագրության համաձայն՝ նախքան սպանությունը եղբայրները գողություն էին կատարել գեղեցկության սրահից։ Ավելին՝ պարզվում է, որ ցերեկը տղաները, մասնավորապես կրտսեր եղբայրը զբաղվել է մուրացկանությամբ, իսկ գիշերներն էլ ավագ եղբոր հետ գողությամբ։

Ընդ որում՝ կրտսերը՝ Հրաչը, տանը՝ մոր կողմից ենթարկվել է բռնության, ունի մտավոր թերզարգացվածության խնդիր։ Իսկ ինչպես «Փաստինֆո»-ին տեղեկացրել էր ոստիկանության գնդապետ Նելլի Դուրյանը, նրան ոստիկանության եւ սոցիալական ծառայության աշխատակիցները, համապատասխան եզրակացության հիման վրա, տեղավորել էին հոգեբուժական հաստատությունում, որտեղից դիմել էր փախուստի։

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝