Լրացուցիչ փորձաքննությունը հաստատել է Խաչատրյան քույրերի առողջությանը հասցված ծանր վնասը

Լրացուցիչ դատաբժշկական փորձաքննության հանձնաժողովը հաստատել է, որ Միխայիլ Խաչատրյանի բռնի գործողությունները ծանր վնաս են հասցրել նրա դուստրերի առողջությանը, որոնք մեղադրվում են ծնողի սպանության մեջ, նշված է աղջիկների փաստաբաններ Մարի Դավթյանի, Ալեքսեյ Լիպցերի, Յարոսլավ Պակուլինի եւ Ալեքսեյ Պարշինի հայտարարության մեջ, հայտնում է «Ինտերֆաքսը»:

«Այսօր քննիչները Խաչատրյան քույրերի փաստաբաններին ծանոթացրել են փորձաքննության արդյունքներին, որն անցկացրել է Մոսկվայի Առողջապահության դեպարտամենտի Դատաբժշկական փորձաքննության բյուրոն: Մայրաքաղաքային դատաբժշկական փորձագետները հաստատել են եզրակացությունը, որն ավելի վաղ կատարել էին Սերբսկու անվան հոգեբուժության եւ նարկոլոգիայի ազգային պետական հետազոտական կենտրոնի նրանց գործընկերները, ըստ որի՝ Խաչատրյան քույրերի մոտ հայտնաբերված հոգեկան խանգարումները Միխայիլ Խաչատրյանի գործողությունների հետ պատճառահետեւանքային կապ ունեն»,- նշված է հայտարարության մեջ:

Քույրերի պաշտպանությունը նշում է, որ փորձաքննությունը աղջիկների առողջությանը հասցված վնասը որակել է ծանր:

«Խաչատրյան քույրերի պաշտպաններն արտահայտում են ընդհանուր կարծիք, որ լրացուցիչ փորձաքննությունները եւս մեկ անգամ հաստատեցին, որ աղջիկները եղել են անհրաժեշտ պաշտպանության վիճակում: Փաստաբանների կարծիքով՝ Խաչատրյան քույրերի քրեական հետապնդումը պետք է դադարեցվի»,- նշված է հայտարարության մեջ:

Հիշեցնենք, որ 57-ամյա Միխայիլ Խաչատրյանի մարմինը՝ պարանոցի եւ կրծքավանդակի կտրած-ծակած բազմաթիվ վիրավորումներով 2018 թվականի հուլիսի 27-ին հայտնաբերվել էր Մոսկվայի Ալտուֆեւյան մայրուղու վրա գտնվող շենքի մուտքում: Սպանության կասկածանքով ձերբակալվել էին տուժածի դուստրերը՝ 19-ամյա Քրիսթինան, 18-ամյա Անգելինան եւ նրանց 17-ամյա կրտսեր քույրը: Նրանց մեղադրանք էր առաջադրվել: Օգոստոսի 2-ին Մոսկվայի Օստանկինյան դատարանը խափանման միջոց էր ընտրել կալանքը:

2018 թվականի սեպտեմբերի 27-ին մայրաքաղաքի Բասմանի դատարանը  երեք քույրերին կալանքից ազատել էր՝ փոխելով խափանման միջոցը որոշակի գործողությունների արգելքով:

2019 թվականի հունիսին քննությունն ավարտվել էր: Վերջնական խմբագրմամբ աղջիկներին մեղադրանք էր առաջադրվել նախնական համաձայնությամբ անձանց խմբով կատարված սպանության համար:

Գործի վերջնական նյութերի համաձայն՝ հանցագործության պատճառը հոր բազմաթիվ անարգումներն էին, որը դուստրերի նկատմամբ կիրառել էր ֆիզիկական եւ սեքսուալ բռնություններ: Նշված որակման շրջանակում քույրերն իրենց մեղավոր չեն ճանաչում:

Միխայիլ Խաչատրյանի նկատմամբ նյութերը այս տավա հուլիսին քույրերի գործից անջատվել էին առանձին վարույթ: Նրա գործողություններում առկա էին դուստրերին խոշտանգելու եւ սեռական բռնության ենթարկելու հանցակազմեր: Սակայն նրա դեմ քրեական գործ չէր հարուցվել կապված նրա մահվան հետ: Այս որոշումը կարող է բողոքարկվել նրա ազգականների կողմից, եթե ցանկանան ապացուցել նրա անմեղությունը եւ այդ մասին խնդրանք ներկայացնեն: