20 տարուց ավելի գաղութներում անցկացրած և իրանցի գործարարին թալանած 50-ամյա տղամարդը մերկացել է նոր հանցադրվագում. Shamshyan.com

Հայաստանի քննչական կոմիտեի Երևան քաղաքի քննչական վարչության Էրեբունի և Նուբարաշեն վարչական շրջանների քննչական բաժնի ճիշտ և հմուտ գործողությունների արդյունքում պարզվել է, որ օրեր առաջ ոստիկանության Էրեբունու բաժնի քրեական հետախուզության բաժանմունքի ծառայողների կողմից մոտ 3 մլն 500 հազար դրամ և 14 հազար 500 դոլար իրանցի գործարարից հափշտակած, Երևանի բնակիչ Հարություն Համբարձումյանը մեկ այլ հաշտակության դեպք էլ է կատարել:

Ինչպես հայտնում է Shamshyan.com-ը, քննիչները պարզել, ապա հիմնավորվել է, որ նա այս տարվա օգոստոսի 14-ին, ժամը 17:00-ի սահմաններում ապօրինի մուտք է գործել Երևան քաղաքի Արշակունյաց պողոտա 5 հասցեում գործող սնանկության գործերով կառավարիչների կոլեգիայի ինքնակառավարվող կազմակերպության աշխատասենյակներից մեկը և այնտեղ գաղտնի հափշտակել աշխատակցի՝ Արսեն Չ.-ին պատկանող թանկարժեք Այֆոն 6 տիպի բջջային հեռախոսը: Փաստերի ճնշման տակ Հ. Համբարձումյանը խոտսովանել է, որ բջջային հեռախոսն ինքն է գողացել և այն վաճառել է իրեն անծանոթ անձին, իսկ գումարով հոգացել է անձնական կարիքները:

Էրեբունու ոստիկաններն ու քննիչներն ունեն լուրջ կասկածներ, որ, հնարավոր է, Հ. Համբարձումյանը նմանատիպ այլ հանցագործություն կամ հանցագործություններ արած լինի: Հարությունյանը նախկինում ազատազրկման վայրերում անցկացրել է ավելի քան 20 տարի ու ամեն անգամ ազատվելուց հետո հերթական հանցագործությունն է կատարել ու հերթական անգամ հյուրընկալվել քրեակատարողական հիմնարկում:

Ավելի վաղ հայտնի էր դարձել, Հարությունյանն Արցախի փողոցի 42 հասցեում գործող «Արիա Էսթիլ» ՍՊԸ-ի աշխատասենյակից գողացել էր Իրանի Իսլամական Հանրապետության քաղաքացի, 47-ամյա Մոհսեն Հասսան Թոուփչհիփուր Արդալիինին պատկանող պայուսակը, որի մեջ եղել էր 3 մլն 500 հազար դրամ և 14 հազար 500 դոլար: 

Ամբողջությամբ` սկզբնաղբյուր լրատվամիջոցում:

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝