«Արթուր Վարդանյանի բանտում մնալը կարող է ճակատագրական լինել». իրավապաշտպան (Տեսանյութ)

«Նորք-Մարաշի» զինված խմբի անդամների նկատմամբ համաներման կիրառելու պահանջով այսօր մի խումբ քաղաքացիներ հավաքվել էին ՀՀ կառավարության դիմաց: Հիշեցնենք, որ նախորդ շաբաթ Ազգային ժողովն ընդունեց, ՀՀ նախագահ Արմեն Սարգսյանն էլ վավերացրեց Էրեբունի-Երեւանի հիմնադրման 2800-ամյակի եւ Հայաստանի առաջին հանրապետության անկախության հռչակման 100-ամյակի կապակցությամբ` քրեական գործերով համաներում հայտարարելու մասին որոշման նախագիծը: Համաներումը տարածվեց նաեւ «Սասնա ծռեր» խմբավորման քրեական գործով անցնող անձանց վրա, որոնց գործողությունների հետեւանքով կար երեք զոհ, մինչդեռ համաներումն այդպես էլ չտարածվեց « Նորք-Մարաշ» խմբի քրեական գործի մասնակիցների վրա, որոնց գործողությունների հետեւանքով ոչ միայն չկային զոհեր, այլ առհասարակ որեւէ հետեւանք չկար:

«Իրավունքի» հետ զրույցում ցույցի մասնակիցներից «Նորք-Մարաշի» խմբի ղեկավար Արթուր Վարդանյանի ընկեր, իրավապաշտպան ՀԱՅԿԱԶ ՄԱԿԱՐՅԱՆԸ ասաց. «Մենք եկել ենք պարոն վարչապետից պահանջելու՝ պարոն Փաշինյան ջան, այո՛, դուք ասել եք, որ չեք զանգելու եւ ասեք՝ սրան ազատեք, նրան բաց թողեք, մյուսին՝ բռնեք, բայց վարչապետն ունի լիազորություն, որպեսզի խիստ հանձնարարական տա եւ մասնավորապես՝ ասի, որ ցանկացած բռնի ուժով զավթված անձ, բռնադատված, քաղբանտարկյալ իրավունք չունի լինել անազատության մեջ: Պահանջում ենք, որպեսզի պարոն Փաշինյանն առարկայական եւ օբյեկտիվ  ուշադրություն դարձնի սույն գործին»:

Ցույցի մասնակիցները պահանջում էին նաեւ ՀՀ վարչապետի պաշտոնակատար Նիկոլ Փաշինյանի հետ հանդիպում. «Պահանջում ենք, որպեսզի 10 օրյա ժամկետում ընդունելություն կազմակերպվի, որպեսզի քննարկենք եւ փորձենք ընդհանուր եզրեր գտնել: Թող գոնե մոտակա ժամանակներում փոխվի խափանման միջոց կալանքը, որովհետեւ Արթուր Վարդանյանն արդեն ֆիզիկապես չի կարող մնալ բանտում, առողջությունը չի ներում»:

Հ. Մակարյանի խորին համոզմամբ՝ Արթուր Վարդանյանի բանտում մնալը  կարող է ճակատագրական լինել. «Հետո գլխներին են տալու, թե վա՜յ, ամա՜ն, ինչի՞ ժամանակին չէիք ասում, մեռանք ասելով…»:

ՀՐԱՆՏ ՍԱՐԱՖՅԱՆ

Հ.Գ.- Առավել մանրամասն դիտե՛ք տեսանյութում.

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝