ԵՐԵՎԱՆՈՒՄ ՄԵԿՆԱՐԿԵԼ Է ԳԵՂԱՍԱՀՔԻ «ԳՐԱՆ ՊՐԻԻ» ՅՈԹԵՐՈՐԴ ՓՈՒԼԸ

Այսօր՝ հոկտեմբերի 10-ին, Երեւանի Իրինա Ռոդնինայի անվան գեղասահքի մարզադպրոցում մեկնարկել է գեղասահքի «Գրան պրիի» յոթերորդ՝ եզրափակիչ փուլը: Մրցաշարին մասնակցելու համար Երեւան են ժամանել աշխարհի 31 երկրների 87 երիտասարդ գեղասահորդներ:

Հայաստանի գեղասահքի ֆեդերացիայի նախագահ Մելանյա Ստեփանյանը մանրամասներ ներկայացրեց կայանալիք մրցաշարից. «Հայաստանը ներկայանալու է հինգ մարզիկով՝ Էդվարդ Տեր-Ղազարյան, Մարինա Ասոյան, Էլեն Հակոբյան, ինչպես նաեւ Վիկտորյա Ազրոյանն ու իր ուկրաինացի զուգընկերը: Էդվարդը մարզվում է Մոսկվայում, Մարինան եւ Էլենը՝ Երեւանում: Սակայն, ցավոք, աղջիկները սահադաշտի հետ կապված տեխնիկական խնդիրների պատճառով շուրջ երկու ամիս մարզումներ չեն անցկացրել եւ վերսկսել են բոլորովին վերջերս: Մեր երիտասարդ գեղասահորդները պետք է պայքարեն աշխարհի ու Եվրոպայի առաջնություններին մասնակցելու իրավունքի համար: Այդ նպատակով նրանցից պահանջվելու է կարճ եւ կամավոր ծրագրերում համապատասխան միավորների պաշար հավաքել»:

Իր հերթին Չմշկասահքի միջազգային միության ներկայացուցիչ Սարգիս Թեւանյանն էլ ընդգծեց մրցաշարի մասշտաբայնությունն ու հյուրընկալող երկիր լինելու կարեւորությունը. «Այսպիսի մակարդակի մրցաշարը Երեւանում անցկացնելը հիանալի հնարավորություն է՝ մարզաձեւը Հայաստանում զարգացնելու համար: Չմշկասահքի միջազգային միությունը ավելի շատ նոր երկրներ ընդգրկելու նպատակներ ունի: Այս առումով Հայաստանը նրա համար միանգամայն նոր է: Երիտասարդական սերիան բաղկացած է յոթ փուլերից, որոնցում միավորներ վաստակելով՝ գեղասահորդները պայքարում են եզրափակիչ փուլի ուղեգրերի համար: Միայն երեւանյան փուլի ավարտից հետո հայտնի կդառնան այն մարզիկների անունները, որոնք դեկտեմբեր ամսին Կանադայի Վանկուվեր քաղաքում կմասնակցեն եզրափակիչ փուլին»:

Դժվար է չհամաձայնվել, որ նման մրցաշարի անցկացումն իրոք բավականին մեծ ձեռքբերում է Հայաստանի համար: Երկար տարիներ գեղասահքը մեր երկրում միայն տեսականորեն պահպանում էր գոյությունը: Սակայն, Երեւանում Իրինա Ռոդնինայի անվան գեղասահքի մարզադպրոցի բացվելուց հետո որոշակի տեղաշարժ նկատվեց: Գումարած դրան, այն, որ Հայաստանում միջազգային մրցումներ են անցկացվում, խոսում է միջազգային չափանիշներին ամբողջովին համապատասխան մարզադպրոց ունենալու հանգամանքի մասին:

ՔՐԻՍՏԻՆԵ ՊԵՏՐՈՍՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝