Կազինո, բանկեր, գաղտնի հանդիպում. ինչու՞ է Վանեցյանը եղել Մոնակոյում

Շաբաթներ առաջ մենք գրել էինք, որ սեպտեմբերին հրապարակվեց ԱԱԾ տնօրեն Արթուր Վանեցյանի և ՀՔԾ ղեկավար Սասուն Խաչատրյանի գաղտնալսված հեռախոսազրույցը: Հրապարակված հեռախոսզարույցը աղմկահարույց էր և ԱԱԾ տնօրենն ու ՀՔԾ ղեկավարը նույն օրը ստիպված եղան հանդես գալ մամուլի ասուլիսով, որպեսզի պարզաբանումներ ներկայացնեն: Ասուլիսի ընթացքում ԱԱԾ տնօրեն Արթուր Վանեցյանը խոսելով հեռախոսազրույցի պահին իր գտնվելու վայրի մասին ասաց. «Ուրեմն, այո ես Ռուսաստանում չեմ եղել: Ես եղել եմ Ժնև քաղաքում՝ դուք գիտեք ֆուտբոլի ֆեդերացիայի նախագահի ընտրության հետ կապված մեկնել էի էնտեղ, որոշակի հարցեր կար քննարկելու»:

Մեր հրապարակման մեջ նշել էինք, որ ԱԱԾ տնօրեն Արթուր Վանեցյանը գաղտնալսման օրը իրականում չի գտնվել Ժնևում: Ըստ շրջանառվող խոսակցությունների Արթուր Վանեցյանն այդ օրերին մասնավոր այցով գտնվել է Մոնակոյում:

Մեր հրապարակումները պաշտոնապես չհերքվեց ու լռությունը եկավ հաստատելու, որ Արթուր Վանեցյանը այդ օրերին գտնվել է Մոնակոյում:

Իսկ ի՞նչ կա Մոնակոյում և ի՞նչը կարող էր ձգել ԱԱԾ պետին այնտեղ: Տարիներ ի վեր գրվել է, որ Հայաստանի քաղաքական էլիտան ու մասնավորապես նախկին նախագահ Սերժ Սարգսյանը հաճախ են այցելել Մոնակո, քանի որ այնտեղ բարձր կարգի կազինոներ կան ու նաև ուժեղ է անվտանգությունը, այսինքն նրանք կարող են խաղալ ու վստահ լինել, որ իրենց կազինո հաճախելու լուսանկարները չեն հայտնվի համացանցում: Իհարկե վստահ չենք, որ Արթուր Վանեցյանը կազինո է հաճախում, բայց լռությունը և Մոնակո կատարած այցը թաքցնելը մեզ տարբեր ենթադրությունների առիթ են տալիս:

Մոնակոն ունի նաև ուժեղ բանկային համակարգ և օֆշորային շատ կազմակերպությունների բանկային հաշիվները գտնվում են հենց այս երկրի բանկերում: Ու եթե հաշվի առնենք նաև այն հանգամանքը, որը ԱԱԾ պետի հորեղբոր 79-ամյա կնոջ անունով կա օֆշորային կազմակերպություն, որի մասին մենք գրել էինք, ապա կառաջանա ևս մեկ պատճառ, որի համար կարող էր Վանեցյանը գնալ Մոնակո:

Մեր նախորդ հրապարակումներից մեկում մենք ևս մեկ պատճառ էինք նշել` Վանեցյանը Մոնակոյում գաղտնի հանդիպում է ունեցել նախկին իշխանության ներկայացուցիչներից մեկի հետ ու փորձել են հանդիպումը բոլորի աչքից հեռու կազմակերպել: Այս պահին Politik.am-ը փորձում է մանրամասններ ճշտել ու առաջիկայում հանդես կգանք նոր հրապարակմամբ, որով հստակ կներկայացնենք, թե վերնշված երեք հանգամանքներից որի դրդմամբ է Վանեցյանը այցելել Մոնակո ու թաքուն պահել այդ այցը:

Նյութի աղբյուրը՝ politik.am

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝