Արդյոք նոր տեղեկացավ իշխանությունը Ֆրանկոֆոնիայի մասին եւ հրատապ որոշում կայացրեց. տեսանյութ

Հայաստանի Ազգային ժողովում ընթանում էր արտահերթ նիստ, որի օրակարգում մեկ հարց է՝ «Հայաստանի Հանրապետության տոների եւ հիշատակի օրերի մասին» Հայաստանի Հանրապետության օրենքում լրացում կատարելու մասին»: Նախաձեռնողը ՀՀ կառավարությունն է:

Հիշեցնենք, որ նախօրեին կառավարության նիստում վարչապետ Նիկոլ Փաշինյանը նշեց, որ մասնավորապես, հոկտեմբերի 7-ից Հայաստանում մեկնարկում են Ֆրանկոֆոնիայի օրերը եւ անհրաժեշտ է լինելու, որ երկու օր (հոկտեմբերի 11-12-ին) ոչ աշխատանքային հայտարարվի: Իսկ դրա համար, ըստ նրա, անհրաժեշտ է օրենսդրական փոփոխություն կատարել հիշյալ օրենքում:

Պատգամավոր Հայկ Բաբուխանյանը հիմնական զեկուցող ԱԳ փոխնախարար Ռուբինյանին հարցեր ուղեց, ով, ի դեպ, հայտնի ՀՀՇ-ական Կարապետ Ռուբինյանի տղան է.

«Ինչո՞վ է պայմանավորված հարցի հրատապությունը եւ կանոնակարգ օրենքով նախատեսված է, որ արտահերթ հարցը հինգ օր առաջ է մտնում քննարկումից Ազգային ժողով, բայց այն մտել է մեկ օր առաջ»: 

Ըստ Ռուբինյանի հրատապությունը պայմանավորված է Հայաստանում, Երեւանում անցկացվելիք Ֆրանկոֆոնիայի միջոցառման հետ: «Ինչպես գիտեք ամսի 7-ից 12-ը նախատեսված են միջոցառումներ, որով էլ պայմանավորված էր հարցի հրատապությունը»: 

Հարցին միջամտեց նաեւ ԱԺ նախագահ Արա Բաբլոյանը եւ ասաց, որ այդ հարցը վերաբերում է ԱԺ նախագահին. «նման պարագայում կանոնակարգը տալիս է այն իրավունքը, որպեսզի, եթե վարչապետը պետք է հրատապ բերի նա բանավոր համաձայնեցնում է ԱԺ նախագահի հետ, ինչը արվել է մեկ օր առաջ»: 

«Այդ մասին հայտնի էր դեռեւս անցյալ տարի նոյեմբեր ամսից», արձագանքեց պատգամավորը, եւ արդյո՞ք նոր տեղեկացաք Ֆրանկոֆոնիայի մասին:

«Անշուշտ ո՛չ, պարոն Բաբուխանյան, նոր չիմացանք, սակայն մտադրությունը կապված Ֆրանկոֆոնիայի հետ տեղափոխել աշխատանքային օրերը, վերջերս է որոշվել, հետեւաբար հիմա ենք ներկայացնում այս նախագիծը»,- եզրափակեց Ռուբինյանը :

Ա. ՀԱԿՈԲՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝