Հոկտեմբերի 7-ից Երևանում տիրելու է ֆրանկոֆոն մթնոլորտ. կկազմակերպվի ֆրանսիացի հայտնի դիջեյի մասնակցությամբ դիսկոտեկ

Հոկտեմբերի 7-ից Երևանում ու Հայաստանում տիրելու է ֆրանկոֆոն մթնոլորտ, միջոցառումների շարքը սկսվելու է հոկտեմբերի 7-ից, այսօր լրագրողների հետ հանդիպմանն ասաց ՀՀ ԱԳՆ գլխավոր քարտուղար, ՖՄԿ գագաթաժողովի անցկացման արտգործնախարարության աշխատանքային հանձնախմբի ղեկավար Վահագն Մելիքյանը:

«Հոկտեմբերի 8-ին ու 9-ին տեղի կունենա նախարարական 35-րդ նիստը, ամսի 9-ին՝  ժամը 17։00-ին, Ազատության հրապարակում տեղի կունենա ֆրանկոֆոնիայի ավանի պաշտոնական բացումը, որին կմասնակցի ՀՀ արտաքին գործերի նախարար Զոհրաբ Մնացականյանն ու Ֆրանկոֆոնիայի միջազգային կազմակերպության գլխավոր քարտուղար Միքայել Ժանը», - ասաց նա։

Վահագն Մելիքյանը նշեց, որ նույն օրը կնշվի նաև երիտասարդության օրը։

ՖՄԿ գագաթաժողովի անցկացման արտգործնախարարության աշխատանքային հանձնախմբի ղեկավարը նշեց նաև, որ ավանում տեղակայված կլինի ավելի քան 40 տաղավար։

«Գործելու է բեմահարթակ, տարբեր համերգային ծրագրեր են լինելու, ունենք բազմաթիվ հյուրեր», - ասաց նա։

Մելիքյանը նշեց, որ հոկտեմբերի 10-ին «Թումո»-ում իր աշխատանքները կսկսի Ֆրանկոֆոն տնտեսական ֆորումը, որը տեղի կունենա ՀՀ նախագահ Արմեն Սարգսյանի բարձր հովանու ներքո։

Հոկտեմբերի 11-ին, արդեն, կմեկնարկի բուն գագաթաժողովը, որը կշարունակվի նաև հոկտեմբերի 12-ին։

«Հայաստան են ժամանելու 83 անդամ ասոցացված ու դիտորդ երկրների ներկայացուցիչներ, ինչպես նաև ՖՄԿ գործընկեր կառույցների ներկայացուցիչներ», - ասաց նա։

Նրա խոսքով՝ հոկտեմբերի 11-ին՝ ժամը 19։30-ին, Հանրապետութան հրապարակում տեղի կունենա Ֆրանկոֆոն գալա-համերգը՝ համաշխարհային ճանաչում ունեցող  երգիչների մասնակցությամբ, իսկ համերգից հետո հրապարակում կկազմակերպվի ֆրանսիացի հայտնի դիջեյի մասնակցությամբ դիսկոտեկ։

Վ. Մելիքյանն ասաց, որ Հայաստան են ժամանելու նաև 40-ից ավելի երկրների ղեկավարներ, նախագահներ ու կառավարությունների ղեկավարներ։

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝