«Իրավունքի» հրապարակումից հետո Ժառանգները որոշել են Ռաֆայել Ջրբաշյանին «Ծերապարտեզից» տանել

Այսօր «Իրավունքն» անդրադարձել էր, որ ՀԽՍՀ արվեստի վաստակավոր գործիչ, բեմադրիչ, ՀՀ ժողովրդական արտիստ ՌԱՖԱՅԵԼ ՋՐԲԱՇՅԱՆԻՆ արդեն մի քանի օր է ժառանգները տեղափոխել են ծերանոց: Ժամեր առաջ խմբագրություն էր զանգահարել 95-ամյա ժողորդական արտիստի թոռնուհին` Ռուզաննան, եւ թեպետ չհերքեց լուրը, բայց սպառնաց դատի տալ խմբագրությանը. «Դա մեր նեղ ընտանեկան ու անձնական խնդիրն է, ոչ մեկ իրավունք չունի դրա մեջ քիթը ,խոթելուե, էլ չեմ ասում հոդված հրապարակելու: Չի կարելի մարդկանց ճակատագրերի եւ զգացմունքների հաշվին նման բան գրել, Ռաֆայել Ջրբաշյանի ու նրա անունի հետ խաղալ: Ռաֆայել Ջրբաշյանը խաղալիք չէ, ոչ մեկ իրեն անտեր չի թողել, հանգիստ թողեք նրան: Ռաֆայել Ջրբաշյանին պետք չեն այցելություններ, որոնք նրան հետո շատ վատ հոգեկան վիճակի մեջ են գցում: Ոչ ոք չի իմանում, որ Ռաֆայել Ջրբաշյանն առողջական ինչ հոգեկան իրավիճակում է եղել, ինչպիսի օրեր է անցկացրել եւ հիմա ինչպիսի օրեր է: Բոլորին թվում է, թե կարող են ամեն օր խմբով այցելել նրան կամ ինչ-որ բան անել: Այդ մարդը ոչ մեկին չի հիշում, իսկի մեզ նորմալ չի հիշում, նա ստաբիլ ռեժիմով խնամքի կարիք ունի, այդքան բան, եւ ոչ մեկ թույլ չի տվել նրա անունի հետ այսպես խաղալ: Այստեղ հարցը մենք չենք նաեւ, չի կարելի այսպիսի հոդված գրել առանց մեզ հետ խորհրդակցելու, սիրուն չի ձեր արարքը»,- վրդովված ասաց թոռնուհին ու հավելեց. «Լիովին իրավունք ունենք ձեր խմբագրությանը դատի տալ եւ պահանջում եմ, որ հենց հիմա, այս պահից ի վեր, այդ հոդվածը ջնջվի, սա հլը ես եմ խոսում, Աստված չանի, որ դուք իրա ժառանգների հետ խոսեք»:

Երբ փորձեցինք պարզաբանել, թե փաստորեն չեք հեքո՞ւմ, որ Ռաֆայել Ջրբաշյանը գտնվում է ծերանոցում, թոռնուհին ասաց. «Ես չեմ զանգահարել, որ դուք ինձ հարցեր տաք, չեմ զանգել, որ արդարանամ, ես արդարանալու ոչինչ չունեմ, զանգել եմ հասկանալու, թե ինչու է այսպիսի հոդված հրապարակվել եւ ինչու մեզ հետ չի խորհրդակցել: Հոդվածում գրել եք, որ հորդորել ենք ծերանոցի աշխատակիցներին, որ ոչ ոքի չթողնեն իր մոտ, որպեսզի հանկարծ չհանրայնացվի մեր արարքը: Ի՞նչ արարքի մասին է խոսքը, հանցագործությո՞ւն ենք արել, դա զուտ մեր ընտանեկան խնդիրն է, մենք ենք չէ՞ իր խնամողը, ոչ թե դուք, կամ ձեր խմբագրությունը, կամ էլ` էն մարդիկ ովքեր ձեզ այդ մասին տեղյակ են պահել: Կամ պետք է վերացվի այդ հոդվածը, կամ փոխվի հոդվածի շարադրանքը, եթե` ոչ, դուք անմիջական ժառանգների հետ գործ կունենաք եւ այդպես շատ ավելի վատ կլինի, ու բոլորը, ի վերջո, ճշմարտությունը կիմանան, բայց ձեր արարքը սիրուն չի»,- եզրափակեց Ռ. Ջրբաշյանի թոռնուհին:

Ինչեւէ, ժողովրդական արտիստի թոռնուհու «ցասումը» թողնելով մեր ընթերցողների գնահատականին` նշենք, որ «Իրավունքը» զանգահարեց Քանաքեռ-Զեյթունում գտնվող «Ծերապարտեզ», որտեղ եւս մեկ անգամ փաստեցին, որ վերջին օրերին այնտեղ է գտնվում Ռաֆայել Ջրբաշյանը: Երբ փորձեցինք տեղեկություն իմանալ նրա առողջական վիճակի մասին, մեզ տեղեկացրեցին. «Իր աղջիկները վաղը տանելու էն իրեն»: Հետաքրքրվեցինք, թե ինչու են այդպիսի որոշում կայացրել, հավելեցին. «Չգիտենք»:

ԼԻԼԻԹ ԵՂԻԱԶԱՐՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝