​​​​​​​Համալսարանի ու բանկի համատեղ բիզնեսի հետեւանքով տուժել է քաղաքացին

Քաղաքացի ՀԱԿՈԲ ՄԿՐՏՉՅԱՆՆ իրեն խաբված է զգում, ստիպված է եղել վճարել երբեք չօգտագործված քարտի համար: Պարզվում է՝ 2013 թվականին նա «Գլաձոր» համալսարանից, որտեղ սովորել է, ստացել է «Հայէկոնոմ» բանկի կողմից թողարկված Visa electron բանկային քարտ։ Վերջերս (31.07.2018) քարտը որոշել է հանձնել բանկին՝ փակման պայմանով, քանի որ այն բացարձակապես չի օգտագործել։

«Բանկի աշխատողը ինձնից պահանջեց սպասարկման գումար վճարել՝ մոտ 7000 ՀՀ դրամի չափով, առարկությանս, թե ինչու պետք է վճարեմ, եթե չեմ օգտագործել տվյալ քարտը ու չեմ տեղեկացվել, որ քարտն ունի տարեկան սպասարկման վճար՝ անկախ դրա օգտագործման հանգամանքից՝ բանկի աշխատակցուհին սպառիչ պատասխան չներկայացրեց, փոխարենը պնդեց վճարել։ Տվյալ պահին գիտակցելով, որ վեճս անիմաստ ժամանակ է խլելու ինձնից, որոշեցի վճարել, եւ փակել քարտը։ Սակայն երբ խնդրեցի քարտի սպասարկման պայմանագրի պատճեն, աշխատակցուհին կտրուկ մերժեց՝ ասելով, որ պայմանագիրն արխիվում է», - պատմում է Հակոբ Մկրտչյանը։

Այսքանից հետո՝ հարց է առաջանում, եթե պայմանագիրն արխիվում է եւ անհասանելի տվյալ աշխատակցուհուն, ապա իրավական ի՞նչ դրույթներով առաջնորդվելով է որոշվել սպասարկման գումարի չափը, արդյո՞ք սա բանկային համակարգում սպասարկման նորմերի խախտում չէ, եւ ի վերջո, ո՞վ է պատասխանատվություն կրելու այս պարագայում, բանկը՞, որ տարիների ընթացքում օրենքի պահանջներին համապատասխան հաճախորդին չի տեղեկացրել պարտքի գոյության մասին, թե՞ համալսարանը, որը քարտը տրամադրելու պահին չի զգուշացրել քարտի օգտագործման պայմանները, մասնավորապես չի նշել, որ այն ենթադրում է տարեկան սպասարկման վճար։

Ի դեպ, դեպքը բավական ուշագրավ է նաեւ այն առումով, որ տարածված տեղեկությունների համաձայն, «Հայէկոնոմ» բանկը պատկանում է գործարար ԽԱՉԱՏՈՒՐ ՍՈՒՔԻԱՍՅԱՆԻՆ, իսկ «Գլաձոր» համալսարանը՝ ՀՀ նախկին դատախազ, ԱԺ հինգերորդ գումարման պատգամավոր ԳԱԳԻԿ ՋՀԱՆԳԻՐՅԱՆԻՆ:

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝