«ԱՐԹՈՒՐ ԳԱՍՊԱՐՅԱՆԸ ԼԵՎՈՆ ՍԱՐԳՍՅԱՆԻ ՀԵՏ ՈՐՈՇԱԿԻ ԲԱՐԵԿԱՄԱԿԱՆ ԿԱՊ ՈՒՆԻ»

Երեկ մամուլում տեղեկություն էր տարածվել, ըստ որի, Պեկ-ում` Բագրատաշենի մաքսատան պետ է նշանակվել Արթուր Գասպարյանը, ով, ըստ նույն լուրերի, հայտնի կոռուպցիոներ է եւ Ալրաղացի Լյովիկի զարմիկը: Հետաքրքիր է՝ ի՞նչ կասեն այս մասին ՊԵԿ-ից, փորձեցինք պարզել այդ կառույցի լրատվական վարչությունից, որտեղից տեղեկացրին. «Լեւոն Հրաչի Սարգսյանի (Ալրաղացի Լյովիկ) քույրը որդի չունի, հետեւաբար՝ Արթուր Գասպարյանը չի հանդիսանում Լեւոն Սարգսյանի քրոջ որդին (լավ էլի- հեղ.): Միեւնույն ժամանակ, հայտնում ենք, որ Արթուր Գասպարյանը Լեւոն Հրաչի Սարգսյանի հետ հեռավոր որոշակի բարեկամական կապ, այնուամենայնիվ, ունի, որը սակայն որոշիչ գործոն չի հանդիսացել նրա պաշտոնեական առաջխաղացումների հարցում: Մասնավորապես, Արթուր Գասպարյանը համակարգում աշխատանքի է անցել 2008-ից: Զբաղեցնելով տարբեր պաշտոններ` սկսած 1-ին կարգի մասնագետից մինչեւ Բագրատաշենի հերթափոխի պետ, հետո նաեւ՝ Բավրայի մաքսային կետ-բաժնի բաժանմունքի պետ: Բագրատաշենի մաքսային կետ-բաժնի պետ է նշանակվել 2018-ի հունիսի 12-ին»:

Ուշագրավն այն է, որ ՊԵԿ-ն այդպես էլ չի անդրադարձել Ա.Գասպարյանի կոռուպցիոներ լինելու մասին խոսակցություններին: Սակայն այստեղ մեկ հանգամանք նկատենք. ներկայիս իշխանական համակարգը դեռ ընդդիմադիր ժամանակներից մաքսային ծառայությունը համարում էր Հայաստանում ամենակոռումպացվածներից մեկը: Ա.Գասպարյանը, լինելով այդ գերկոռումպացված կառույցի միջին օղակի պաշտոնյա, ով գործում էր ուղղակիորեն սահմանին, այսինքն՝ աշխատում էր ներկրողների հետ, կարո՞ղ էր այդ համակարգային գերխնդրից՝ կռուպցիայից զերծ մնալ: Եթե կարողացել է, ուրեմն կմնա պարոն Գասպարյանին կնքել «ճերմակ ագռավ» մականունով: Իսկ եթե պարզվի, որ՝ ոչ, մամուլում ասվածի պես. «Մաքսակետի աշխատակիցների խոսքով՝ իրենք երբեք այդքան անգրագետ, միեւնույն ժամանակ այդ կարգի կաշառակեր ղեկավար չեն տեսել», ապա հարց է ծագում՝ սա՞ է Փաշինյանի ասած զրո կոռուպցիան ու մյուս զրոները:

ԻԼՈՆԱ ԱԶԱՐՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝