Հարցերին տիրապետո՞ւմ են, բայց պատասխաններ չունե՞ն

Ախալքալաքի շրջանի Կարծախ գյուղում օրերս նշվեց ավանդական դարձած տոներից մեկը` մեծն աշուղ Ջիվանու օրը: Հայաստանյան նոր իշխանություններից արարողությանը ներկա էր ՀՀ սփյուռքի նախարարի տեղակալ ԴԱՎԻԹ ՍԱՐԳՍՅԱՆԸ, ում հետ էլ «Իրավունքն» առիթ ունեցավ զրուցելու Ջավախքում առկա խնդիրների եւ Սփյուռքի նախարարության անելիքների մասին: Սակայն պարզվեց` փաստաբանի արտոնագիր ունեցող ՀՀ սպորտի վարպետ, 1-ին կարգի մրցավար Դ. Սարգսյանը, որպես փոխնախարար, գրեթե ասելիք չուներ: Ավելին` ոչ միայն ի պաշտոնե, այլեւ առհասարակ առաջին անգամ էր գտնվում Ախալքալաքում:

– Պարոն փոխնախարար, առաջնահերթ ի՞նչ անելիքներ կան Ջավախքում, արդեն հասցրե՞լ եք ի պաշտոնե խորանալ առկա խնդիրների մեջ:

– Բոլոր հարցերին տիրապետում ենք, եւ նախարարությունն ունի որոշակի ծրագրեր` դրանց հետ կապված: Կան ծրագրեր, որոնք ընթացիկ իրականացվում են, եւ ունենք նաեւ այնպիսիք, որոնք նախատեսում ենք հաջորդ տարվա համար:

– Այսինքն` այն ծրագրերն են լինելու, ինչ որ իրականացվում էին նախկինում, թե՞ նոր մոտեցումներ են սպասվում:

– Այս պահին չեմ կարող ասել, քանի որ դեռեւս քննարկման փուլում են գտնվում:

– Բայց ընդամենը երկու ամսից էլ քիչ ժամանակ է մնացել նոր ուսումնական տարվա համար: Հետաքրքրվե՞լ եք, Ջավախքում հայերեն դասագրքերի, գրականության պակաս չկա՞:

– Գրականության պակաս, որքանով տեղյակ եմ, միշտ այստեղ եղել է եւ, կարծես թե, այս հարցը տարբեր ձեւերով տարբեր մարդկանց օգնությամբ լուծվել է որոշակի առումով:

ՀՐԱՆՏ ՍԱՐԱՖՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝