Հայաստանը կարող է դառնալ ուժեղ և լավ գործընկեր Եվրասիական տարածքում. Արմեն Սարգսյանի հարցազրույցը Россия 24-ին

Արխիվ 16-20 4 Հունիս, 2018 21:28

ՀՀ նախագահ Արմեն Սարգսյանը Россия 24 հեռուստաընկերության «Мнение» հաղորդաշարին տված հարցազրույցում խոսել է հայ-ռուսական հարաբերությունների զարգացման մասին և նշել է, որ բավարար չէ համարում դրանց ներկայիս մակարդակը և զարգացման նոր հնարավորություններ է տեսնում:

«Ես այնքան էլ բավարարված չեմ մեր հարաբերություններից, որովհետև իմ պատկերացմամբ՝ մենք կարող էինք ունենալ շատ ավելի խորը և լայն հարաբերություններ»,- ասել է նա՝ նշելով, որ մասնավորապես բավարարված չէ Ռուսաստանում Հայաստանի ներկայացվածության առնչությամբ:

«Մեր մշակութային և կրթական ներկայացվածությունն ինձ չի բավարարում: Ես շատ եմ ճանապարհորդում Ռուսաստանում, համայնքը հսկայական է, բայց ներկայության որակ չկա: Ես նաև կցանկանայի Հայաստանի տարածքում տեսնել Ռուսաստանի ավելի որակյալ և խորը ներկայություն՝ մշակութային առումով, լինի դա թատրոն, կինո, արվեստ, թե գրականություն»,- ասել է Արմեն Սարգսյանը:

Հայաստանի նախագահը նշել է, որ տնտեսական առումով հարաբերությունների խորությունը նույնպես բավարար չէ, և այդտեղ էլ կարելի է է՛լ ավելի ընդլայնել փոխգործակցությունը:

«Հայաստանը կարող է դառնալ Ռուսաստանի Դաշնության և Եվրասիական տարածքի երկրների իրական գործընկեր որոշակի ոլորտներում, օրինակ՝ նոր տեխնոլոգիաների ոլորտում: Մեզ մոտ շատ արագ տեմպերով զարգանում են IT տեխնոլոգիաները, և կա դրանց էլ ավելի զարգացման պոտենցիալ: Մենք կցանկանայինք դառնալ մեր բոլոր բարեկամ երկրների իրական գործընկեր»,- ասել է Արմեն Սարգսյանը:

Պատասխանելով Հայաստանում ռուսերեն լեզվի դերի մասին հարցին՝ Արմեն Սարգսյանը նշել է, որ փոխարենը կարելի է խոսել Ռուսաստանում հայոց լեզվի դերի մասին:

«Հայաստանում ռուսերեն լեզվի տեղի փոխարեն ես կասեի Ռուսաստանում հայոց լեզվի տեղը, որովհետև եթե Ռուսաստանում բնակվում է 3 միլիոն հայ, նրանք նույնպես պետք է հնարավորություն ունենան օգտագործել իրենց լեզուն, ունենան իրենց դպրոցները և այլն: Ինձ թվում է՝ դա ճիշտ մոտեցում է»,- ասել է նա:

ՀՀ նախագահը նաև խոսել է հայկական սփյուռքի մասին և ընդգծել դրա կարևորությունը Հայաստանի զարգացման գործում:

«Երբեմն ես ասում եմ, որ մենք փոքր երկիր ենք, բայց համաշխարհային ազգ: Եվ դա ճիշտ է, նման ազգերը շատ քիչ են՝ մեկ, երկու, դուք գիտեք՝ ովքեր են նրանք: Հայերը այդ քչերից մեկն են: Ես ցանկանում եմ, որ մեր համաշխարհային ազգը, այդ թվում՝ Ռուսաստանում բնակվող և Ռուսաստանի քաղաքացիներ հանդիսացող հայերը նախ լինեն այդ երկրի լավ քաղաքացիներ և երկրորդ, որ նրանց կապն իրենց պատմական հայրենիքի հետ իրական լինի, որ նրանք իմանան, որ այստեղ տուն ունեն, որ տարբեր երկրներում նրանց ունեցած փորձը, լինի դա ԱՄՆ-ում, Ֆրանսիայում, Արգենտինայում, թե Լիբանանում, Եգիպտոսում, Մոսկվայում, Պետերբուրգում, ներդնեն մեր գործի մեջ: Մեծ սփյուռքը հայ ժողովրդի ուժն է», -ասել է արմեն Սարգսյանը:

ՀՀ նախագահը նշել է նաև, որ Հայաստանն ամբողջովին չի օգտագործել իր հնարավորությունները ԵԱՏՄ-ում և այդ ուղղությամբ հարկավոր է լուրջ աշխատանք իրականացնել: Նա հավելել է, որ Հայաստանը դեռ չի ցույց չի տվել անգամ իր գործընկերներին, թե ինչ ներդրում կարող է ունենալ:

«Հայաստանը կարող է դառնալ ուժեղ և լավ գործընկեր Եվրասիական տարածքում: Հարկավոր է նաև հաշվի առնել այն փաստը, որ Հայաստանը պայմանագիր է ստորագրել Եվրամիության հետ: Այս բարդ ժամանակներում, երբ, ցավոք, հաճախ երկրները միացնող կամուրջների փոխարեն պատնեշներ են հայտնվում, Հայաստանը, լինելով ԵԱՏՄ տարածքի անդամ և գործընկեր, լավ հարաբերություններ ունի նաև Եվրոպայի հետ: Այսինքն՝ Հայաստանը յուրահատուկ երկիր է, յուրօրինակ փոքր կամուրջ, որ կարող է ծառայել ի նպաստ բոլորին»,- ասել է նա: