Կոտայքում սկսելու են մերժե՞լ ընտրված համայնքապետերին

Կառավարության նիստի ժամանակ այսօր Կոտայքի մարզպետ նշանակվեց «Քաղաքացիական պայմանագիր» կուսակցության անդամ ՌՈՄԱՆՈՍ ՊԵՏՐՈՍՅԱՆԸ: Նիստից հետո` նորանշանակ մարզպետների եւ վարչապետ Նիկոլ Փաշինյանի հանդիպումից Ռ. Պետրոսյանը մանրամասներ պատմեց:

- Պարոն վարչապետի հետ քննարկում էինք կարեւորագույն, առաջնահերթ, անհրաժեշտ քայլերը ու քաղաքական, մշակութային կառավարման հիմնական նորմերը, որոնք մենք հռչակել ենք այս փուլում եւ իրագործելու ենք տեսանելի ապագայում: Առաջին քայլը, որպես մարզպետ, այն է լինելու, որ հենց հիմա գնում եմ մարզ` մարզպետարանի աշխատակազմի հետ ծանոթանալու:

-Որպես մարզպետ, ի՞նչ առաջնահերթություններ եք առանձնացրել:

- Կառավարման նոր մշակույթի բացառապես օրենքով եւ Սահմանադրությամբ առաջնորդվելն ու քաղաքական թիմի, կառավարության ծրագրի ճշտությամբ պրոեկտելը մեր մարզում:

- Պարոն մարզպետ, Դուք ասել էիք, որ ազատվելու եք վատ աշխատող համայնքապետերից, որոնք չեն զարգացրել համայնքը: Բայց տեղական ինքնակառավարման մարմիններն ընտրովի պաշտոն են: Ինչպե՞ս եք պատրաստվում «ազատվել» նրանցից:

- Քաղաքական աշխատանք տանելու եւ ժողովրդի հետ աշխատելու արդյունքում: Եթե ժողովուրդը որոշում է, որ որեւէ ընտրված  համայնքապետ չպետք է այլեւս տնօրինի համայնքային ռեսուրսներին եւ ներկայացնի իր շահերը համայնքապետի դերում, ապա մենք այդ պարագայում անզոր ենք…

- Հնարավո՞ր է Ձեր հորդորով մարզի բնակիչները մերժեն համայնքապետերին:

- Չեմ կարող այդ հարցին պատասխանել, թող քաղաքացիները որոշեն:

- Ի դեպ, Կոտայքում բավական մեծ է «Ծառուկյան» դաշինքի առաջնորդ Գագիկ Ծառուկյանի ազդեցությունը: Ինչպե՞ս եք պատրաստվում հաղթահարել հնարավոր խոչընդոտները:

- Իմ առաջնահերթ խնդիրն է մարզում միջին վիճակագրական բնակչի վերափոխումը ՀՀ քաղաքացու, իսկ տեղական իշխանությունների, քաղաքացու եւ տարբեր մասշտաբի գործարարների, քաղաքական գործիչների հարաբերությունները կարգավորվելու են բացառապես օրենքով եւ Սահմանադրությամբ:

ՀՐԱՆՏ ՍԱՐԱՖՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝