«Մեր համեստ լուման ունենք ԵԽԽՎ հատկապես ադրբեջանաբեւեռ կոռուպցիայի բացահայտման գործում»

«Հպարտության մեծ զգացում ունեմ առ այն, որ ես եւ գործընկերներս մեր համեստ լուման ունենք ԵԽԽՎ հատկապես ադրբեջանաբեւեռ կոռուպցիայի բարձրաձայնման, բացահայտմանը միտված տարիներ տեւած հետեւողական աշխատանքներում», - գրել է ԱԺ հինգերորդ գումարման ՀՀԿ խմբակցության պատգամավոր ՆԱԻՐԱ ԿԱՐԱՊԵՏՅԱՆՆ ու մանրամասնել. «Այս օրերին ընկերներս հատկապես հիշում են դեռ 2016 թ. հոկտեմբերին ԵԽԽՎ տխրահռչակ ադրբեջանատենչ նախագահի անկառավարելի պահվածքը, երբ ես իմ ելույթում սկսեցի խոսել ԵԽԽՎ ադրբեջանական լոբբիի բացահայտման առաջին արգասիքների՝ Լուկա Վոլոնտեի եւ իր հետեւից հավանաբար բացվող կծիկի մասին… Պեդրո Ագրամունտը ուղղակի անջատում էր խոսափողս՝ թույլ չտալով խոսել այն բանի մասին, ինչում այսօր ապացուցվեց, որ նա ակնհայտորեն թաթախված էր, իսկ ԵԺԿ խմբի նիստի ժամանակ նախկին ղեկավար Աքսել Ֆիշերն իրեն թույլ տվեց ինձ նկատողություն անել՝ առանց խմբի ներսում քննարկման՝ խմբի հեղինակությանը վնասող հայտարարությունների, հարցազրույցների եւ ելույթների համար։ Դե ինչ, Աքսե՛լ, իրականում տեսար, թե մեր խմբում ով էր Պեդրոն…»:

Ն. Կարապետյանը նշում է, որ համաձայն Կանոնակարգային հանձնաժողովի որոշման՝ Պեդրո Ագրամունտը (Իսպանիայի պատվիրակության ղեկավար, ԵԽԽՎ նախկին նախագահ, ԵԺԿ խմբի անդամ), Խորդի Շուկլան (Իսպանիայի պատվիրակության անդամ, ALDE խմբի անդամ), Սամադ Սեիդովը (Ադրբեջանի պատվիրակության ղեկավար, EC խմբի անդամ), Չեզար Պրեդան (Ռումինիայի պատվիրակության անդամ, EPP խմբի անդամ) կոպտորեն խախտել են ԵԽԽՎ անդամի կանոնակարգը եւ զրկվում են կազմակերպությունում որեւէ պաշտոն զբաղեցնելու, զեկուցող նշանակվելու, անդամ երկրներում ընտրություններ դիտարկելու, վեհաժողովն այլ մարմիններում ներկայացնելու եւ այլ իրավունքներից:

«Դեռեւս ընդամենը 4 պատվիրակի հանդեպ է կիրառվել ԵԽԽՎ պատժամիջոցներ, այդ թվում եւ Ադրբեջանի պատվիրակության ղեկավարի, նրանք բոլորն էլ
մեր հակալոբբիստների ցուցակում են, սակայն ցուցակը շատ ավելի մեծ է։

Աշխատելով ԵԽԽՎ Կանոնակարգային հանձնաժողովում, բազմիցս ականատես եմ եղել այս հանձնաժողովի սկզբունքային եւ վճռական մոտեցմանը։ Հուսանք, որ սա կլինի դաս եւ զսպող գործոն մյուսների համար», - շեշտում է Ն. Կարապետյանը։

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝