Սերգեյ Նարիշկին. «Պետք է հաշվի առնենք ՀՀ փորձը, այդ թվում` խորհրդարանական` անվտանգության ապահովման հարցում»

Այսօր կայացած Հավաքական անվտանգության պայմանագրի կազմակերպության (ՀԱՊԿ) արտագնա նիստից հետո, ՌԴ Պետական դումայի նախագահ, ՀԱՊԿ ԽՎ-ի խորհրդի նախագահ ՍԵՐԳԵՅ ՆԱՐԻՇԿԻՆԸ  հայտարարեց, որ հանդիպումը շարունակությունն է ձեւավորված այն բարի ավանդույթի, ըստ որի ՀԱՊԿ ԽՎ նիստերն անցկացվում են  կազմակերպության անդամ պետություններում. «Նմանատիպ հանդիպումներ մենք անցկացրել ենք Մինսկում, Բիշքեկում, Մոսկվայում, եւ ահա երկրորդ անգամ հանդիպում ենք Հայաստանի հյուրընկալ մայրաքաղաքում` Երեւանում»: Անդրադառնալով ՀԱՊԿ-ի առջեւ ծառացած մարտահրավերներին` Ս. Նարիշկինն ընդգծեց. «Դուք լավ գիտեք, որ փետրվարի 22-ին ընդունվեց Ռուսաստան Դաշնության եւ ԱՄՆ-ի միջեւ համատեղ հայտարարություն`Սիրիայում ռազմական գործողությունները դադարեցնելու մասին: Այս փաստաթղթի նպատակն էր, որ տրվի ազդակ` լուծելու սիրիական հակամարտությունը, այն էլ՝ քաղաքական միջոցներով: Այսօր հիմնականում պահպանվում է հրադադարը: Ավելին` ընթացքը տանում է նրան, որ միջազգային ջանքերը համատեղվեն այս բարբարոսական կազմավորումների դեմ, որոնք ունեն «Իսլամական պետություն» անունը եւ այլ ահաբեկչական խմբավորումների դեմ»: Այս համատեքստում ՀԱՊԿ ԽՎ-ի խորհրդի նախագահը շեշտեց, որ իրենց համար մտահոգիչ է Սիրիայի սահմանային տարածքը Թուրքիայի կողմից կրակահերթի տակ պահելն ու այլ գործողություններ նախաձեռնելը, որոնք ապակայունացնում են առանց այն էլ պայթյունավտանգ տարածաշրջանը: Ապա խոսեց պայթունավտանգ տարածաշրջանում Հայաստանի դերի մասին. «Հայաստանն իր աշխարհագրական դիրքի եւ միջազգային լարվածության օջախներին մոտ լինելու պատճառով զբաղեցնում է հատուկ տեղ ՀԱՊԿ-ում, ուստի` մենք պետք է հաշվի առնենք ՀՀ փորձը, այդ թվում` խորհրդարանական, անվտանգության ապահովման հարցում: Այս առումով կա գործողությունների հստակ փաթեթ, որոնք կնպաստեն մեր կազմակերպության ուժային բաղադրիչի ամրապնդմանը»:

Ի դեպ, հավելենք, որ ՀԱՊԿ անդամ երկրների խորհրդարանական պատվիրակությունների ներկայացուցիչները վաղը կայցելեն Երեւանի «Էրեբունի» օդանավակայան` ծանոթանալու Կովկասում մեր պաշտպանական հնարավորություններին:

ՀՐԱՆՏ ՍԱՐԱՖՅԱՆ