Էդուարդ Շարմազանով. «Մեր ռուս գործընկերների եւ դաշնակիցների հետ պատրաստ ենք պայքարել ահաբեկչության դեմ»

ՀՀ Ազգային ժողովում ավարտվեց ՀԱՊԿ անդամ երկրների խորհրդարանական պատվիրակությունների ներկայացուցիչների հանդիպումը, որի ավարտից հետո  ՀԱՊԿ ԽՎ-ում հայաստանյան խորհրդարանական պատվիրակության ղեկավար, ԱԺ փոխնախագահ ԷԴՈՒԱՐԴ ՇԱՐՄԱԶԱՆՈՎԸ  խոսեց հանդիպման մանրամասների մասին` մասնավորապես նշելով «Մենք քննարկել ենք ահաբեկչական կազմակերպությունների գործողություններին հակազդելու միջոցների, մեր տարածաշրջանի իրավիճակի մասին: Ուզում եմ ընդգծել, որ մեր տարածաշրջանի եւ ընդհանրապես ՀԱՊԿ անդամ երկրների համար ահաբեկչությունը, ֆաշիզմը, ռասիզմը, քսենոֆոբիան` իր բոլոր դրսեւորումներով հանդերձ, իրական սպառնալիք են իրենցից ներկայացնում: Եվ որպես ՀԱՊԿ-ում հայաստանյան խորհրդարանական պատվիրակության ներկայացուցիչ եւ ղեկավար` ուզում եմ վստահեցնել ձեզ, որ հայկական պատվիրակությունը մեր ռուս գործընկերների եւ դաշնակիցների հետ պատրաստ է պայքարել ահաբեկչության դեմ` իր բոլոր դրսեւորումներով»: Ապա շեշտեց. «Մենք հանցագործություն ենք համարում Թուրքիայի կողմից ռուսական Սու-24 ռազմական ուղղաթիռի կործանումը, ինչպես որ հանցագործություն ենք համարում ղարաբաղա-ադրբեջանական շփման գծում Ադրբեջանի կողմից հայկական ուղղաթիռի խոցումը: Մեր կարծիքով` ՀԱՊԿ անդամ երկրների պատվիրակությունները բոլոր միջխորհրդարանական հարթակներում պետք է ելույթ ունենան փոխհամաձայնեցված, որովհետեւ մենք դաշնակիցներ ենք»: Իսկ ինչ վերաբերում է մեր տարածաշրջանի ռազմաքաղաքական իրավիճակին, Է. Շարմազանովը ընդգծեց. «Հայաստանի Հանրապետության համար կա միայն մեկ ուղի բոլոր կոնֆլիկտների լուծման, մասնավորապես Ղարաբաղյան հիմնախնդրի լուծման համար, որը բաղկացած է բոլորի համար ընդունելի երեք կետից: Խոսքը ԼՂՀ ժողովրդի ինքնորոշման իրավունքի, տարածքային ամբողջականության, ուժային գործոնի բացակայության մասին է: Ադրբեջանի կողմից կիրառվող բոլոր փորձերը` լուծել հարցն ուժային ճանապարհով, ընդունելի չեն»:          

Իսկ վերջում  ՀԱՊԿ ԽՎ-ում հայաստանյան խորհրդարանական պատվիրակության ղեկավարը շնորհակալություն հայտնեց ՀԱՊԿ ԽՎ-ի խորհրդի նախագահ Սերգեյ Նարիշկինին ու շեշտեց, որ նրա ղեկավարած տարիների ընթացքում նշանակալի է եղել հայաստանյան պատվիրակության դերն ու համագործակցությունը ՀԱՊԿ-ում:

ՀՐԱՆՏ ՍԱՐԱՖՅԱՆ