ԻՆՉՈՒ Է ՄԱՏՉԵԼԻ ԴԵՂԱՄԻՋՈՑԻ ՆԵՐԿՐՈՒՄԸ ՄԵՐԺՎԵԼ, ԱՆՀԱՅՏ Է

Խմբագրությանը դիմած քաղաքացին պարզաբանում էր խնդրում հետեւյալ հարցի հետ կապված: Նրա ներկայացմամբ՝ տեւական ժամանակ է, ինչ «Ֆեստալ» դեղամիջոցը, որը մարսողության կարգավորման համար է, բացակայում է հայաստանյան դեղատներում: Այն, ըստ քաղաքացու, համեմատաբար մատչելի եւ էֆեկտիվ դեղամիջոց էր: Փոխարենը, առկա են նույն նպատակին ծառայող այլ դեղատեսակներ, որոնցից մի քանիսը եւս քաղաքացուն օգնում են, սակայն դրանք անհամեմատ թանկ են: Թե ինչն է նշված դեղի բացակայության պատճառը, անգամ դեղատների աշխատակիցներն են դժվարացել հստակ բան ասել:

Ուրեմն ո՞րն է պատճառը, որ տվյալ դեղամիջոցը այլեւս չկա շուկայում: Այս հարցով դիմեցինք ՀՀ առողջապահության դեղորայքային քաղաքականության բաժնի պետ ԱՆԱՀԻՏ ՄԿՐՏՉՅԱՆԻՆ, ով հետեւյալ պարզաբանումը ներկայացրեց.

- «Ֆեստալ» դեղամիջոցը վերջին անգամ Հայաստան է ներկրվել 2016 թվականի երրորդ եռամսյակում, ապա մի փոքր խմբաքանակ նույն թվականի չորրորդ եռամսյակում: Դրանից հետո, սակայն, տվյալ դեղամիջոցի ներկրումը Հայաստան մեր կողմից մերժվել է: Թե ինչն է մերժման ստույգ պատճառը, այս պահին կդժվարանամ ասել, գուցե որակի հետ կապված խնդիր է առաջացել. չեմ կարող հիմա ոչինչ ասել: Ձեռքիս տակ չկան մերժման հիմքերը: Ավելին ասեմ, արդեն մոտենում է տվյալ դեղամիջոցի գրանցման ժամկետը, բայց «Ֆեստալ» արտադրողների կողմից դեռ հայտ չի ներկայացվել՝ կրկին անհայտ պատճառներով:

- Իսկ Դուք չե՞ք փորձել պարզել:

- Անկեղծ ասած, դեռ գրանցման համար ժամանակ ունեն, հնարավոր է՝ դիմեն: Ավելին ոչինչ ասել չեմ կարող, թե ինչու է մերժվել, կամ ինչու չեն գրանցման հայտ ներկայացրել:

- Իսկ ի՞նչ անեն այն քաղաքացիները, ովքեր այդ դեղամիջոցից էին տեւական ժամանակ օգտվում, ու հիմա փաստացի այն չկա:

- Այդտեղ եւս որեւէ խնդիր չկա, կան «Ֆեստալին» փոխարինող դեղամիջոցներ, որոնք նույն դեղաբանական ազդեցությունն ունեն: Օրինակ, նույն «ֆեստալին» դեղաբանական առումով համարժեք դեղեր են «Մեզիմֆորտեն» եւ «Կրեոնը»:

ԻԼՈՆԱ ԱԶԱՐՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝