«Ընտրությունների ընթացքում կարող են բացահայտվել անկանխատեսելի իրավիճակներ». ով կլինի թատրոնի տնօրենը

Հունվարի 12-ին տեղի կունենա Երեւանի կամերային երաժշտական թատրոնի տնօրենի ընտրությունը, որի համար իրենց թեկնածություն են առաջադրել 4 մարդ, նրանցից երկուսի անուններն արդեն հայտնի է` մեկը թատրոնի տնօրենի ժամանակավոր պաշտոնակատար Եղիշե Խերանյանն է, մյուսը` նույն թատրոնի դերասան Արա Դեղտրիկյանը:
Հիշեցնենք, որ նախորդ տարվա  հոկտեմբերից թատրոնի նախկին տնօրեն Վարդան Գրիգորյանի պաշտոնավարման ժամկետը լրացել էր եւ վերջինս դուրս էր եկել թատրոնից:
Ի՞նչ ակնկալիքներ ունի առաջիկա ընտրությունից  Վարդան Գրիգորյանը, ինչո՞ւ  այս ընտրությունում չի առաջադրել իր թեկնածությունը, այս եւ մի շարք այլ հարցերի շուրջ «Իրավունքը» զրուցեց հենց Վարդան Գրիգորյանի հետ:
Վ. ԳՐԻԳՈՐՅԱՆԸ ԹԵԿՆԱԾՈՒԹՅՈՒՆԸ ՉԱՌԱՋԱԴՐԵԼՈՒ  ՊԱՏՃԱՌՆԵՐԻ ՄԱՍԻՆ

-Իմ թեկնածությունը չառաջադրելու հիմնական պատճառը մրցույթի չափորոշիչներն են, որոնք ենթարկվել են փոփոխության եւ այնտեղ սահմանափակվել են լայն մասնակցությամբ հնարավորությունները  ոչ միայն իմ, այլեւ այլոց համար: Ըստ էության մրցույթին կարող են մասնակցել միայն դերասանական կամ ռեժիսորական կրթություն ստացած, նաեւ տնտեսագետի որակավորում ունեցող անձինք: Կարծում եմ` սա կոպիտ խախտում է, քանի որ կարող է մասնակցել հազար մարդ, բայց այլ հարց է քանիսը կանցնեն, կամ կանցնե՞ն,  թե` ոչ: Կարծում եմ` սա արդարացի չէ,  սա միայն իմ կարծիքը չէ, սա չի վերաբերում իմ արդեն նախկինում աշխատած թատրոնին, սա կարծես թե տարածվում է մյուս բոլոր պետական թատրոններում: Տպավորություն է ստեղծվում, որ պետք է գործի կանախատեսելիության սկզբունք : Կա նաեւ հարցի մյուս կողմը, որն առաջացնում է տարակուսանք,  իսկ ո՞վ է ասել,  որ դերասանը կամ ռեժիսորն ունեն վարչական, կառավարման  հմտություններ , առավել եւս, որ շատ դեպքերում ստեղծագործող մարդիկ անկանխատեսելի են կառավարման իմաստով: Կոնկրետ իմ պարագայում, մի քիչ զավեշտ է ստացվում, քանի որ ութ տարի աշխատել եմ գերատեսչությունում եւ կարծես ոչինչ չէր խանգարում մասնակցել այս մրցույթին, հաղթել եւ աշխատել պայմանագրով սահմանված երեք տարին: Սա չի դիտարկվում, նաեւ այն դեպքում, որ այս ընթացքում անցել եմ վերապատրաստում, ստացել տարբեր որակավորման վկայականներ:
Ո՞Ր ԹԵԿՆԱԾՈՒՆ ԿԱՐՈՂ Է  ԹԱՏՐՈՆԻ ԼԱՎ ՂԵԿԱՎԱՐ ԴԱՌՆԱԼ

- Այս ամենի պատկերին չեմ կարող հստակ ասել, թե ով կընտրվի, որովհետեւ ամեն ինչ էլ կարող է լինել , նույնիսկ անկանխատեսելին:  Ընտրությունների ընթացքում կարող է բացահայտվել շատ անկանխատեսելի իրավիճակներ:  Քանի որ հոկտեմբերից սկսած հեռացել եմ թատրոնից միանշանակ դժվարանում եմ ասել: Այստեղ հաշվի չեմ առնում թատրոնի ներքին կարծիքը, քանի որ խիստ հակասական եւ անկանխատեսելի տեսակետներ են: Երկուսի դեպքում էլ ոչինչ չի բացառվում, միանշանակ առաջնահերթություն տալ մեկին կամ մյուսին, այս պահին դժվարանում եմ ասել: Իմ կարծիքով` արժե բոլորովին նոր մարդու տալ նախապատվություն, որը արժանի կլինի, կտիրապետի բոլոր օրենքներին եւ արժանի կերպով կանցնի մրցութային բոլոր փուլերը:
ՎԱՐԴԱՆ ԳՐԻԳՈՐՅԱՆԻ ԱՆՁԻ ՇՈՒՐՋ ՍՏԵՂԾՎԱԾ ԱՍԵԿՈՍՆԵՐԻ ՄԱՍԻՆ

- Ասել, թե այս ընթացքում  չեմ հետեւել թատրոնի գործունեությանը`  ճիշտ չի լինի, այնտեղ իհարկե տեղի են ունեում որոշակի աշխատանքներ, վերջերս նույնիսկ հանձնել են ամանորյա մի ներկայացում: Այնտեղից տեսում եմ արտահոսք, դժգոհություններ էլ են եղել, թեւե վստահաբար կարող եմ ասել, ում ինչ հարցնեն, կարող են ինձ մատնացույց անել, որպես նախկին տնօրենի, որովհետեւ այդպիսի լուրեր շրջանառվում են: Շատ կցանկանայի, որ այն գաղափարը, որ իմ պաշտոնավարման ընթացքում իրենց կամքով եւ ոչ միայն,  հեռացած անձինք այնտեղ են, նույնիսկ անձինք, որոնք իրենց մասնագիտությանը  չեն տիրապետել: Փաստորեն նրանք էլ են վերադարձել  թատրոն, սրանք լավ հույսեր չեն ներշնչում: Վերջին ամսում հոդվածներ են հրապարակվում, որոնց չեմ ցանկանումա անդրադառնալ, որոնք ապատեղեկատվություն են տարածում եւ գրված են չիմացության արդյունքում: Երբեմն փորձում են նսեմացնել այն աշխատանքը, որն իմ ղեկավարման տարիներին իրականացվել է թատրոնում: Այս ճահճոտ, գարշահոտ թատրոնը բերել եմ տեսքի մինչեւ իմ ժամկետի ավարտվելը: Տարածում են, թե ստեղծագործական հուն չկար, եւ այլն: Ցավալի է, որ փաստերը ճիշտ չեմն մատուցում հանրությանը:

ԶՎԱՐԹ ԽԱՉԱՏՐՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝