Ովքեր և որքան են վճարում Հայաստանին «Գարդասիլ» պատվաստանյութը կիրառելու համար

Կառավարությունը բացահայտում է, թե որքան ֆինանսավորում է ստացել Հայաստանը «Գարդասիլ» պատվաստանյութը կիրառելու համար։ Ով և որքան է պատրաստ վճարել ՀՀ կառավարությանը` «Գարդասիլի» պատվաստման ծրագիրը ներդնելու դիմաց։

Նոյեմբերի 30-ին ՀՀ կառավարությունն առանց քննարկման ու առանց զեկուցման պաշտոնապես կհաստատի 2018թ–ից Հայաստանում «Գարդասիլ» պատվաստանյութի պաշտոնական կիրառումը։

Համապատասխան որոշման նախագիծն արդեն ներառված է գործադրի այդ օրվա նիստի օրակարգի չզեկուցվող հարցերի շարքում։

Պատվաստումների ազգային օրացույցում մարդու պապիլոմավիրուսային վարակի դեմ պատվաստանյութն, ըստ նախագծի, կներառվի  մինչև 2018 թվականը և կկիրառվի 2 դեղաչափ սխեմայով, 6 ամիս ինտերվալով:

Պատվաստումները նախատեսվում է իրականացնել ԳԱՎԻ (Պատվաստանյութերի և իմունիզացիայի գլոբալ դաշինք) միջազգային կազմակերպության դրամաշնորհային ծրագրի միջոցներով: «Դեռևս 2016 թվականին ՀՀ առողջապահության նախարարությունն օժանդակության համար ծրագրային առաջարկով դիմել էր ԳԱՎԻ (Պատվաստումների և պատվաստանյութերի գլոբալ դաշինք) կազմակերպությանը, որը զգալի աջակցություն է ցուցաբերում կարիք ունեցող երկրներում նոր և սակավ կիրառվող  պատվաստանյութերի ներդրմանը: ԳԱՎԻ կազմակերպության կողմից ծրագրային առաջարկը հավանություն է ստացել, և ԳԱՎԻ-ն հայտնել է իր պատրաստակամությունը օժանդակելու Հայաստանին՝ երկու տարվա ընթացքում տրամադրելով պատվաստանյութը և պատվաստումների օժանդակ պարագաները, ինչպես նաև ներդրման համար նախապատրաստական միջոցառումների մի մասի ծախսերը»,– ասված է կառավարության որոշման նախագծում:

Եվ այսպես. այս տարի hունիսին Հայաստանը պապիլոմա վիրուսի պատվաստումների ներդրման համար ԳԱՎԻ-ից 178 000 ԱՄՆ դոլար է ստացել։ 2017թ–ի հունվարի 1-ի դրությամբ Իմունականխարգելման ազգային ծրագրի բյուջեյում 31 986 040  դրամ գումար կա։ Լրացուցիչ ևս 84 614 08 0 դրամ էլ փոխանցվել է ԳԱՎԻ–ի կողմից որպես աջակցություն։

Թե որքան գումար կփոխանցվի 2018թ–ին, առայժմ չի բացահայտվում։ Բայց հայտնի է, որ 2019 թվականից սկսած Հայաստանն ինքնուրույն պիտի հոգա պատվաստանյութի ձեռքբերման ծախսերը, ինչը կկազմի տարեկան շուրջ 131 մլն դրամ։ «Գարդասիլի» 1 դեղաչափն ամենաէժանն արժե 4.5 ԱՄՆ դոլար։

GAVI–ն հանրային-մասնավոր գործընկերության ձևաչափով գործող միջազգային հիմնադրամ է: Հիմնական դոնորներն են զարգացած երկրների կառավարությունները, Առողջապահության համաշխարհային կազմակերպությունը, ՅՈՒՆԻՍԵՖ–ը, Համաշխարհային բանկը, պատվաստանյութերի արտադրությամբ, հետազոտությամբ զբաղվող կազմակերպություններն ու անհատ բարերարները:

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝