Բացահայտվել է Մամիկոն Խուրշուդյանի մեքենայից կատարված գողությունը

Անհայտ անձը կամ անձինք նոյեմբերի 8-ին Դավիթաշեն վարչական շրջանի 1-ին թաղամասում՝ այգու հարեւանությամբ, կոտրել են այնտեղ կայանված Honda մակնիշի 35 FX 174 համարանիշի ավտոմեքենայի առջեւի կողային ապակին ու գումար հափշտակել: Առավել ուշ հայտնի դարձավ, որ մեքենան պատկանում է «Եռամիասնություն՝ հանուն զարգացման» հասարակական կազմակերպության նախագահ, AAD.AM կայքի հիմնադիր ՄԱՄԻԿՈՆ ԽՈՒՐՇՈՒԴՅԱՆԻՆ: Իսկ տեղի ունեցած դեպքի մասին նոր տեղեկություններ են պարզվել քիչ առաջ, ինչի մասին սոցցանցում գրել է հենց Մ. Խուրշուդյանը՝ շեշտելով, որ իր մեքենայից գողության դեպքն ու կատարած անձը 24 ժամն էլ չանցած ոստիկանների օպերատիվ աշխատանքի շնորհիվ բացահայտվել է:

«Շնորհակալ եմ անհանգստացող ու սրտացավ բոլոր ծանոթ ու անծանոթ մարդկանց, ովքեր գրում կամ զանգահարում էին ու իրենց մտահոգությունը հայտնում դեպքի առնչությամբ: Առանձնահատուկ շնորհակալ եմ ՀՀ Ոստիկանությանը՝ հասարակական կարգի պահպանման ու նման դեպքերում արագ արձագանքման համար: Հուսով եմ, որ վաղը կստանամ իմ կորցրած իրերը», - նշել է Մ. Խուրշուդյանն ու հավելել. «Ցավում եմ, որ նրանք, ովքեր, մեղմ ասած, շատ էին «ուրախացել» դեպքի կապակցությամբ, այդ ուրախությունը այսքան կարճ տեւեց: Կյանքում հաղթում է արդարությունը, իսկ արդարություն առաջինը փնտրեք ձեր մեջ, նոր քննեք ու դատեք այլոց գործերը…»:

ՀՐԱՆՏ ՍԱՐԱՖՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝