Ինչպես է արձագանքում գործադիրը Ա. Լիխաչովի հայտարարությանը` ՀՀ ճանապարհների վիճակի վերաբերյալ

ՌԴ Էկոնոմիկայի եւ զարգացման նախարարի առաջին տեղակալ Ալեքսեյ Լիխաչյովը  վերջերս հայ խմբագիրների հետ հանդիպման ընթացքում հայտարարել է, որ Հայաստանում զբոսաշրջության զարգացմանը խոչընդոտում են վատ ճանապարհները: «Իրավունք»-ն այսօր տրանսպորտի եւ կապի փոխնախարար Արթուր Առաքելյանից հետաքրրքվեց` ինչպե՞ս է արձագանքում այս հայտարարությանը, ու ինչ հետեւություններ է արել նախարարությունը: «Ինչ հետեւություններ պիտի անի: Ճանապարհները խոշոր ներդրումներ պահանջող ենթակառուցվածքներ են: Նախագծել ենք խոշոր ծրագրեր այդ ոլորտում, մասնավորապես, դա «Հյուսիս- Հարավ»-ն է, որը կլուծի մեր հիմնական մայրուղու խնդիրը: Բացի այդ` իրականացվում են վարկային ու բյուջետային ծրագրեր: Այս տարի մեկնարկելու է եւս մեկ ծրագիր, որի կատարմամբ հիմնովին կնորոգվի Ալավերդի-Վրաստան  ճանապարհները: 

Ինչ վերաբերում է Մարտունի- Վարդենիս անբարեկարգ ճանապարգի համար բողոքի ակցիային, փոխնախարարի խոսքով` ՏԿ նախարարությունը  խնդրին ծանոթ է, ներառված է համաշխարհային բանկի հետ իրականացվող  վարկային ծրագրերի շրջանակում:

Մտահոգիչ չէ՞, որ Հայաստանի վատ ճանապարհների մասին խոսում է  ռուս  բարձրաստիճան պաշտոնյան, Արթուր Առաքելյանը խորհուրդ  է տալիս Լիխաչովին ուշադիր լինել Ռուսաստանի ճանապարհների վիճակին: 

«Եղե՞լ եք Ռուսաստանում, այնտեղ այնպիսի վիճակ է, ինչպես Հայաստանո՞ւմ»,- հետաքրքրվեցինք ՏԿՆ-ի պաշտոնյայից:

«Ես չեմ ուզենա համեմատական բերել, քանի որ ՌԴ մեր գործընկերները բարձրաձայնում են խնդիրները, խոշոր ծրագրերով են հանդես գալիս: Որպես ոլորտի պատասխանատու` կցանկանամ ներդրումներն ավելի շատ լինեն: Մենք ուշադիր ենք ամեն դրամի դիմաց ստացված արդյունքը վերահսկելու եւ մեծ ցուցանիշներով հանդես գալու  համար»,- ասաց  պրն Առաքելյանը: 

Ապրիլյան քառօրյա պատերազմի ժամանակ եւ դրանից հետո ի հայտ եկան մի շարք խնդիրներ, որոնցից մեկը Գորիս- Սիսիան ճանապարհի վատ վիճակն է: Հանրային խորհրդի նախագահ Վազգեն Մանուկյանը վերջերս հորդորեց տրանսպորտի եւ կապի նախարարությանը փոսերը լցնելու փոխարեն թող պետբյուջեից պահանջի  մի փոքր ավելի  գումար` ճանապարհը մաս-մաս  տարիների ընթացքում սարքելու համար:  Ինչպես է վերաբերվում նախարարությանը Վազգեն Մանուկյանի  խորհրդին: «Շնորհակալ ենք խորհրդի համար: Մենք անպայման կվերլուծենք իր առաջարկը, բայց այդ ծրագիծը կրկնում է Հյուսիս-Հարավ ծրագիծը, այդ պատճառով  չենք կարող կատարել խոշոր կապիտալ ներդրումներ: Մենք չենք կարող խոշոր գումարներ ծախսել, հետո քանդել եւ դրա վրա կառուցել «Հյուսիս-Հարավը»: Որոշվել է փոսային նորոգմամբ  պահպանվի ծրագիրը, մինչեւ «Հյուսիս-Հարավը» ավարտվի եւ հիմնովին վերանորոգվի այդ հատվածը»,-եզրափակեց  փոխնախարարը:

Էկոնոմիկայի նախարար Արծվիկ Մինասյանն էլ «Իրավունք»-ի հետ զրույցում, պարոն Լիխաչովի հայտարարության հետ կապված ասաց, որ ՀՀ-ի տնտեսական քաղաքականության կարեւոր հարցերից է ճանապարհային ենթակառուցվածի բարելավումը գրավչության, արագընթացության նպատակով: «Նորություն ասված չէ, բայց զբոսաշրջության համար օդային փոխադրումներն ու երկաթուղու զարգացումն է կարեւոր»,- ասաց գործադիրի անդամը: 

Սոնա Դավթյան 

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝