Ինչ պահանջով են առաջիկայում ակցիա իրականացնելու արցախահայերը. Փաստաբանը փակագծեր է բացում

Հայտնի է, որ արցախահայերը պատրաստվում են ակցիա իրականացնել առաջիկա օրերին։ Որն՞ է լինելու արցախահայերի պահանջը, ովքեր են կազմակերպիչները հարցը ուղղել ենք արցախցի փաստաբան Ռաֆայել Մարտիրոսյանին, ով նախ նկատեց.

-Անկեղծ ասած՝ առաջիկայում նախատեսվող ակցիայի կազմակերպիչների և վերջնական ձևակերպված պահանջների վերաբերյալ այս պահին ամբողջական տեղեկատվության չեմ տիրապետում, ուստի ճիշտ չեմ համարում որևէ մեկին կազմակերպիչ անվանել կամ պահանջ վերագրել՝ առանց հաստատված տեղեկության։ Բայց եթե խոսքը արցախահայության այսօր կուտակված սոցիալական և բնակարանային խնդիրների մասին է, ապա կարծում եմ՝ դրանցից ամենասուրն իսկապես բնակարանային ապահովության հարցն է։ Խնդիրը միայն այն չէ, թե պետությունը ինչ չափի աջակցություն է տրամադրում։ Խնդիրն այն է, թե այդ աջակցությամբ արցախահայ ընտանիքն իրականում ի՞նչ բնակարան կարող է ձեռք բերել։ Անշարժ գույքի շուկայական արժեքները, բնակարանների գները, հիփոթեքային պարտավորությունները և ընտանիքների փաստացի եկամուտները պետք է դիտարկվեն մեկ ամբողջության մեջ։Եթե տրամադրվող հավաստագրի կամ աջակցության չափը և բնակարանի իրական շուկայական արժեքը միմյանց չեն համապատասխանում, ապա մարդուն փաստացի կանգնեցնում ենք լրացուցիչ և երբեմն անհաղթահարելի ֆինանսական պարտավորության առաջ։ Իսկ բռնի տեղահանված ընտանիքի համար հիփոթեքը պետք է լինի բնակարան ձեռք բերելու գործիք, ոչ թե նոր սոցիալական կախվածության կամ երկարատև պարտքային բեռի աղբյուր։ Հետևաբար, եթե առաջիկա ակցիայի օրակարգում իսկապես բնակարանային խնդիրն է, ես կարծում եմ՝ հարցը պետք է բարձրացվի շատ կոնկրետ՝ բնակարանների իրական արժեքի, տրամադրվող աջակցության չափի, հիփոթեքային պարտավորության և արցախահայ ընտանիքների վճարունակության միջև անհամաչափության վերացման մասին։Եվ այստեղ ես կուզեի, որ քննարկումը չսահմանափակվեր միայն որքան գումար է տրամադրվում հարցով։ Պետք է պատասխանել ավելի կարևոր հարցի՝ այդ գումարով այսօր արցախահայ ընտանիքը Հայաստանում արժանապատիվ և սեփական բնակարան ձեռք բերելու իրական հնարավորություն ունի՞, թե՞ ոչ։

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝