Հիմա էլ հրապարակ են «նետվում» տագրները

Թեպետ օրեր առաջ հայտնի դարձավ, որ Աբովյան համայնքի տեղական ինքնակառավարման ընտրություններում «Քաղաքացիական պայմանագիր» կուսակցության ցուցակը կգլխավորի Հովհաննես Աբրահամյանը, որը ՔՊ Աբովյանի տարածքային կառուցի ղեկավարն է, բայց պարզվում է՝ իշխանությունն այդ ընտրությունների համար պատրաստում է նաեւ բուֆերային այլ թեկնածու։

Մամուլում շրջանառվող տեղեկություններով՝ «Ռեստարտ» քաղաքացիական-երիտասարդական նախաձեռնության հիմնադիր անդամ ՌՈՒԲԵՆ ԲԱՆՈՒՉՅԱՆԸ, որը նաեւ համանուն հիմնադրամի հոգաբարձուների խորհրդի անդամ է, պատրաստվում է առաջադրվել Աբովյանում՝ իբրեւ քաղաքապետի թեկնածու՝ «Քաղաքը բոլորին» կարգախոսով։

Ի՞նչ է հայտնի Ռուբեն Բանուչյանի մասին, ահա այստեղ է ամենաուշագրավը։ Նա մասնագիտությամբ լրագրող է, վերջին տարիներին տարբեր լրատվամիջոցներում է աշխատել՝ որպես հաղորդավար, պրոդյուսեր։ Իր ֆեյսբուքյան էջում պարբերաբեր հանդես է գալիս ընդդիմադիր դիրքերից, անգամ չի խորշում արցախյան թեմատիկային անդրադառնալ։ Այո՛, առաջին հայացքի այստեղ ոչ մի տարօրինակ բան չկա, բացի նրանից, որ վերջինս ՔՊ-ական պատգամավոր Սոնա Ղազարյանի տագրն է՝ սեփական ամուսնու եղբայրը։ Ավելին՝ նույն Ռուբեն Բանուչյանը նախորդ գումարման ժամանակ եղել է նաեւ Սոնա Ղազարյանի օգնականը խորհրդարանում։ Այսինքն՝ լիովին կիսել է իշխանության վարած քաղաքականությունը։ Իսկ թե հիմա ինչ գործառույթ պետք է իրականացնի Աբովյանում, ժամանակը ցույց կտա, բայց փաստն այն է, որ քաղաքականության մեջ հորքուրի գանձերին, երկրի թիվ մեկ աներձագերին փոխարինելու են գալիս ո՛չ ավել, ո՛չ պակաս տագրները։

ՀՐԱՆՏ ՍԱՐԱՖՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝