Հալաբյանում հայտնաբերված նորածնի կյանքին վտանգ չի սպառնում․ բժիշկ

Երևանի Հալաբյան փողոցում հայտնաբերված նորածնի կյանքին վտանգ չի սպառնում, լրագրողներին հայտնել է բժշկական կենտրոնի բժիշկներից մեկը։

«Պատասխանատու բան եմ ասում, բայց կարծում եմ՝ կյանքին վտանգ չի սպառնում»,- հավելել է բժիշկը։ Նրա խոսքով՝ նորածնին բժշկական կենտրոն են տեղափոխել օգոստոսի 10-ի երեկոյան՝ շտապօգնության ուղեկցությամբ։

Բժշկի փոխանցմամբ՝ երեխայի վիճակը գնահատվել էր ծանր, ջերմաստիճանն իջել էր մինչև 30 աստիճան։ «Այդ ջերմաստիճանը կրիտիկական է նորածինների, հատկապես՝ նոր ծնվածների համար»,- ասել է բժիշկը։ Նա պարզաբանել է, որ նման վիճակում երեխային չի կարելի միանգամից տաքացնել։ Բժիշկները նրա մարմնի ջերմաստիճանն աստիճանաբար բարձրացրել են, և այժմ այն նորմայի սահմաններում է՝ 36,7 աստիճան։

Նորածնի մոտ առկա է նաև շնչառական անբավարարություն, ինչի պատճառով նրան CPAP սարքի միջոցով շնչառական աջակցություն է տրամադրվում։ Բժշկի խոսքով՝ երեխան ինքնուրույն է շնչում, իսկ սարքն օգնում է թոքերում պահպանել անհրաժեշտ դրական ճնշումը։

Նախնական գնահատմամբ՝ շնչառական աջակցության անհրաժեշտությունը կարող է պահպանվել մի քանի օր։ Բժիշկների հաշվարկով՝ երեխան ծնվել է հղիության մոտ 36-րդ շաբաթում և փոքր-ինչ վաղաժամ է։ Նրա քաշը 2550 գրամ է, հասակը՝ 48 սմ։ Զարգացման արատներ կամ բռնության հետքեր չեն հայտնաբերվել։

Բժիշկը նշել է, որ պորտալարի վիճակից դատելով՝ երեխան ծնվել է օգոստոսի 10-ին՝ հայտնաբերվելուց մոտ 3-6 ժամ առաջ։ Նրա խոսքով՝ կարելի է վստահորեն ասել, որ նորածինը բուժհաստատությունում չի ծնվել։

Նա նշել է, որ նորածնի ծնողներն այս պահին հայտնի չեն։ Բժշկական կենտրոն արդեն այցելել են սոցիալական ծառայության ներկայացուցիչները և կազմել երեխայի հայտնաբերման վերաբերյալ համապատասխան ակտ։ Բժշկի խոսքով՝ բուժումն ավարտելուց հետո նորածինը կտեղափոխվի մանկատուն։

Եթե բարդություններ չառաջանան, բուժումը կարող է տևել շուրջ 22 օր։ Օգոստոսի 10-ին Ներքին գործերի նախարարությունը հայտնել էր, որ նորածինը հայտնաբերվել է Հալաբյան փողոցի 13 շենքի մոտ՝ շորի մեջ փաթաթված։

Երեխային տեղափոխել էին հիվանդանոց։ ԶԼՄ-ների տվյալներով՝ նորածինը աղջիկ է, հայտնաբերվել է շենքի խաղահրապարակում՝ երկաթե թիթեղների տակ, նրան առաջինը նկատել է քաղաքացին և ահազանգել շտապօգնություն։

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝