ՍԴ-ն մերժել է ԱԻՆ նախկին նախարար Փիլոյանի դիմումի քննությունը

Հայաստանի Սահմանադրական դատարանը մերժել է Արտակարգ իրավիճակների նախկին նախարար Անդրանիկ Փիլոյանի դիմումի քննությունը, որով վիճարկվում էր Քրեական դատավարության օրենսգրքի՝ վճռաբեկ բողոքների քննարկման կարգին վերաբերող դրույթի սահմանադրականությունը, հայտնել է Փաստինֆոն։ Փիլոյանը խնդրում էր Սահմանադրության 61-րդ հոդվածին (որը երաշխավորում է արդյունավետ դատական պաշտպանության իրավունքը) հակասող և անվավեր ճանաչել Քրեական դատավարության օրենսգրքի 383-րդ հոդվածի 3-րդ մասը։

Ըստ դիմողի՝ այդ նորման Վճռաբեկ դատարանին ուղղակիորեն թույլ է տալիս բողոքը վարույթ ընդունելը մերժելու մասին որոշման մեջ իսպառ չպատճառաբանել այն հետևությունը, թե ինչու բարձրացված հարցի վերաբերյալ իրավունքի զարգացման խնդիր առկա չէ։

Դիմումը կապված է Փիլոյանի վերաբերյալ քրեական գործի հետ։ Նրա պաշտպանությունը նախկինում բողոքարկել էր Վերաքննիչ հակակոռուպցիոն դատարանի 2026 թվականի փետրվարի 4-ի որոշումը, սակայն Վճռաբեկ դատարանը մերժել էր բողոքը վարույթ ընդունել։ Փիլոյանի կարծիքով՝ արդյունքում ինքը զրկվել է բարձրագույն դատական ատյանից իր գործի համար էական նշանակություն ունեցող իրավական հարցերի նախադեպային պատասխանները ստանալու հնարավորությունից։

Մասնավորապես, պաշտպանական կողմը կասկածի տակ էր դնում «ներքին դիտում» օպերատիվ-հետախուզական միջոցառման արդյունքների՝ որպես ապացույց օգտագործման թույլատրելիությունը։ Փիլոյանը վկայակոչում էր Վերաքննիչ հակակոռուպցիոն դատարանի դատավորներից մեկի հատուկ կարծիքը, որը համաձայնել էր պաշտպանական կողմի համապատասխան փաստարկին։ Սահմանադրական դատարանը մերժել է գործի քննությունը՝ նշելով, որ դիմումում առաջադրված հարցը ենթակա չէ ՍԴ քննությանը։

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝