Որտեղի՞ց երաշխիքներ, որ Վիլենն էլի չի խմի․ ԶԱՐՄԱՆՔ

Նիկոլ Փաշինյանի զուգընկերուհի ԱՆՆԱ ՀԱԿՈԲՅԱՆԸ, բանուգործ թողած, շարունակում է անդրադառնալ Հայաստանում ընտանեկան բռնության դեպքերին, դրանք թաքցնելու պրակտիկային ու ընդհանրապես խնդրին առնչվող իրավիճակին։ Հակոբյանը կարծում է, թե պատճառները նաեւ օրենսդրական բացերի մեջ են։ Նրա կարծիքով՝ եթե աշխարհում ամեն երրորդ կին, ըստ պաշտոնական վիճակագրության, ենթարկվում է ընտանեկան բռնության, ապա Հայաստանում գուցե բռնությունը կիրառվում է յուրաքանչյուր առաջին կնոջ նկատմամբ։ Այս հայտարարությունն էլ քանի որ չցնցեց որեւէ մեկին, նա ավելի հեռուն գնաց, թե՝ ընտանիքներում բռնության թեմայի բարձրաձայնումից հետո իր կյանքին ուղղված սպառնալիքներ է զգում։ Գլխավոր դատախազն էլ, «փեշերը քշտած», ընթացք է տվել հրապարակմանը։ Անդրադառնալով վերոնշյալին՝ մեդիափորձագետ Տիգրան Քոչարյանը գրում է․ «Եթե ձեզ զարմացնում է` ինչու այս ամառվա շոգին ու արձակուրդների մեջ հանկարծ սկսվեց շրջանառվել կանանց իրավունքների ու ընտանեկան բռնությունների արհեստածին հարցը, ապա ասեմ։ Գալիս է սեպտեմբերը, եւ պետք է վավերացնել բազմաչարչար Ստամբուլյան կոնվենցիան ու սահմանադրական խայտառակ ռեֆորմները»։ Իսկ եթե խոսքն ամենեւին էլ Ստամբուլյան կոնվենցիան ընդունելու հողը նախապատրաստելու մասին չէ, ապա ակամա հարց է առաջանում. եթե պետական ողջ ապարատը մեկ հրապարակման շուրջ այսպիսի արագությամբ է շարժվում, ապա ի՞նչ է իրականում կատարվում։ Կարո՞ղ է վերջում պարզվի, որ հենց Աննան է ընտանեկան բռնության զոհը․․․ Հը՞ն, պարոն Փաշինյան։

Իսկ մինչ Փաշինյանը հեռախոսազրույց է ունենում ՌԴ նախագահի հետ՝ խնդրելով միջոցներ ձեռնարկել հայկական ծագման ապրանքների՝ ռուսական շուկա արտահանման սահմանափակումները վերացնելու ուղղությամբ, ՀՀ էկոնոմիկայի նախարար ԳԵՎՈՐԳ ՊԱՊՈՅԱՆԸ փորձում է բոլորովին այլ պատկեր ներկայացնել։ Նախարարը հայտարարում է, թե 2026 թ․-ի հունվար-հունիսին Հայաստանից արտահանումը դեպի Չինաստան աճել է 83,4 տոկոսով, դեպի Հնդկաստան՝ 81,3 տոկոսով, իսկ դեպի Եվրամիություն՝ 80 տոկոսով։ Այստեղ առաջանում է տրամաբանական հարց. եթե հայկական արտահանման աշխարհագրությունն այնքան հաջող է դիվերսիֆիկացվել, ինչպես փորձում է ներկայացնել Պապոյանը, ապա ինչո՞ւ է Փաշինյանն անձամբ դիմում Կրեմլին՝ խնդրելով լուծել ռուսական սահմանափակումների հարցը։ Եթե Չինաստանը, Հնդկաստանը եւ Եվրամիությունը լիարժեք փոխարինել են ռուսական շուկային, ապա ինչո՞ւ է Մոսկվայի որոշումներից դեռ կախված հայկական արտահանողի ճակատագիրը։ Ավելին, Պապոյանը ներկայացնում է միայն աճի տոկոսները, բայց չի նշում բազային ծավալները։ Տոկոսային բարձր աճը դեռ չի նշանակում, որ տվյալ շուկաները ծավալով կարողացել են փոխարինել Հայաստանի ամենախոշոր առեւտրային գործընկերներից մեկին։ Փոքր բազայի դեպքում նույնիսկ համեմատաբար փոքր ավելացումը կարող է արտահայտվել տպավորիչ տոկոսներով, մինչդեռ իրական դրամական կամ տոննայական աճը կարող է զգալիորեն համեստ լինել։ Թե՞ սրանք էլ են ֆիկտիվ թվեր, պարոն Պապոյան, ինչպես ժամանակին Ձեր իսկ պնդմամբ՝ ֆիկտիվ էիք անդամակցել կուսակցություններից մեկին։

Գյումրիի ՏԻՄ ընտրություններին հարբած ու լրագրողների հետ զրույցում իրեն ավելորդություններ թույլ տված ՔՊ-ական ՎԻԼԵՆ ԳԱԲՐԻԵԼՅԱՆՆ էլ առաջադրվել է ԱԺ պաշտպանության եւ անվտանգության հարցերի մշտական հանձնաժողովի նախագահ։ Հետաքրքիր է՝ ՔՊ-ին որտեղի՞ց երաշխիքներ, որ Վիլենն էլի չի խմի ու այս անգամ ռազմական գաղտնիքներ ափռ-ցփռ հայտնի տեսախցիկների առաջ։

ԶԱՐՄԱՑԱԾ Է «ԻՐԱՎՈՒՆՔ»-Ը

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝