Բաքուն կարող է 3-4 ժամում ջնջվել երկրի երեսից, և սա չափազանցություն չէ. իրանցի պատգամավոր

Բաքուն չգիտի, որ կարող է 3-4 ժամում ջնջվել երկրի երեսից, և սա չափազանցություն չէ։ Այս մասին հայտարարել է Իրանի խորհրդարանի պատգամավոր, Ազգային անվտանգության հարցերի հանձնաժողովի անդամ Աբոլֆազլ Զոհրեվանդը՝ անդրադառնալով նրան, թե ինչպիսին կլինի Իսլամական Հանրապետության արձագանքը, եթե Ադրբեջանը ներքաշվի իր դեմ պատերազմում։

Իրանցի պատգամավորն անդրադարձել է ամերիկյան CNN-ի վերջին աղմկահարույց բացահայտմանը, ըստ որի՝ Իրանի դեմ պատերազմի ժամանակ Իսրայելը գաղտնի զորքեր՝ հատուկ ռազմական և հետախուզական ստորաբաժանումներ է տեղակայել Ադրբեջանում՝ Իրանի հյուսիսային սահմանին հարակից մի քանի դիրքերում, որոնցից ամենամոտը՝ իրանական Թավրիզ քաղաքից ընդամենը մոտ 100 կիլոմետր հեռավորության վրա։ Իսրայելական ուժեը՝ այդ թվում հատուկ նշանակության զորքեր, ռազմական ուղղաթիռներ և «Մոսադ»-ի անձնակազմ, Ադրբեջանի տարածքից հետախուզություն, դրոնային գործողություններ են իրականացրել և գաղտնալսող սարքել տեղադրել Իրանի հյուսիսային բնակավայրերում։ Ադրբեջանի տարածքից իրականացված հիմնական գործողություններից մեկը եղել է մարտի 4-ին Իսլամական հեղափոխոության պահապանների կորպուսի հետախուզության հատուկ գործողությունների ստորաբաժանման ղեկավար Ռահման Մողադդամի սպանությունը։

Զոհրեվանդը հայտարարել է, որ Իրանի վրա իսրայելական հարձակումների հիմնական մասը հենց Ադրբեջանի տարածքից է իրականացվել։

«Հիմա Լեռնային Ղարաբաղում թե՛ Թուրքիան է տեղակայել իր ռազմական ուժերը, թե՛ Իսրայելը։ Բաքվի հյուսիսում գտնվող ռազմական օդանավակայանը տվել են նրանց, և ոչ ոք չի կարող դրանից մի քանի կիլոմետր հեռավորության վրա գտնվել։ Նրանք այնտեղ մշտապես զորքեր, տեխնիկա են բերում, աշխատանքներ են անում։ Մենք, իհարկե, գիտենք դա, սակայն կառավարությունը չի արձագանքում: Ուզում եմ ասել՝ սա պատերազմ է սիոնիզմի դեմ։ Այն նույն նկարագիրը, որն ունի Բեն Զայեդը (Արաբական Միացյալ Էմիրությունների նախագահը – խմբ.), ունի նաև Ալիևը. եթե ավելի վատը չլինի, հաստատ Բեն Զայեդից լավը չէ։ Նրանք սիոնիստների հետ պայմանավորվածության մեջ են, և մենք պետք է հասկանանք, թե ում հետ գործ ունենք։ Մենք գիտեինք, որ Էմիրությունները երկրորդ Իսրայելն է, բայց քանի դեռ չէին հարձակվել մեզ վրա, նրանց դեմ ոչինչ չարեցինք։ Քուվեյթն էլ գիտեինք, Ադրբեջանն էլ գիտենք»,- ասել է իրանցի պատգամավորը։

Զոհրեվանդը զգուշացրել է՝ եթե Ադրբեջանն իրենց դեմ թշնամական գործողությունների մեջ ներքաշվի, հողին կհավասարեցվի Իրանի կողմից։

«Մեր սկզբունքն ու մեր մեթոդը չափավորության, ռացիոնալության) վրա է հիմնված, բայց եթե հարվածեցին՝ այնպես կտանք նրանց գլխին, որ էլ վեր չկենա։ Բաքուն չգիտի, որ կարող է 3-4 ժամում ջնջվել երկրի երեսից։ Սա չափազանցություն կամ դատակ խոսք չէ»,- ընդգծել է Զոհրեվանդը:

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝