Քարոզարշավներդ «զիբիլով» կտրենք, բայց մենք էլ ենք մարդ

Ինչպես արդեն գիտենք, ողջ հանրությունը լծված է քարոզարշավ վարելով կամ լսելով: Թե ում նյարդերը որքան կդիմանան, հարցի այլ կողմն է, բայց այն, որ Երեւանի քաղաքապետն ու քաղաքապետարանը իր ողջ վարչական շրջանի ղեկավարների հետ միասին լծված են քարոզարշավով, անհերքելի է:

Աղբամանների մասին բոլորովին մոռացած թաղապետները, հատկապես Նոր Նորք վարչական շրջանի թաղապետ Մարատ Սեւոյանը, մոռանում է հրահանգել աղբահանության բաժնին, որ գոնե օրը մեջ աղբը տանեն: Չորրորդ զանգվածի Գյուլիքեխյան հատվածում, աղբը ողբում է, աղերսում, որ իրեն էլ ուշադրություն դարձնեն:

«Իրավունք»-ը անդրադարձել էր նույն խնդրին` կրկին չորորդ զանգվածում աղբահանության հետ կապված: Նկատենք, այն ժամանակ քարոզարշավը դեռ մեկնարկված չէր: Հիմա առավել եւս, երբ ունեն ձայն կորզելու խնդիր, արդյոք դժվար է պատշաճ կերպով իրականացնել աղբահանությունը:

Բոլորովին այլ խնդիր է առաջացել Նոր Նորքի 7-րդ զանգվածում՝ 46 շենքի ողջ տարածքով մեկ հոսում է 5-րդ զանգվածից եկեղ կոյուղաջուրը: Կրկին անպատասխան, անլուծում:

Եվ նորից «Իրավունք»-ի լրագրողի միջամտությամբ հարցը լուծվեց, սակայն ավաղ, ժամանակավոր: Հոսքը կրկին կա ու անգամ լցվում է հարակից խանութները:
Հարց քարոզարշավին մասշտաբային խոստումներ տվող, մետրոյի կայարան կառուցող քաղաքապետին, վարչական շրջանի ղեկավարին. մինչեւ ե՞րբ եք անտեսելու քաղաքացու, բնակչի, նույն ձեզ ընտրողի կամ չընտրողի մարդկային իրավունքները: Մինչեւ ե՞րբ եք ասֆալտ փռել-քանդելով ձեր միսիան կատարված համարելու:

Սա էլ կարմիր գիծ չէ, տրանսպորտի թանկացում չէ, վարչապետի համար մետրոյի վճար կատարել չէ, սա ընդամենը աղբահանություն է, որը կրկին ձախողել եք, տղե՛րք:

ՆԱՆԱ ՍԱՐԳՍՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝