ԳՅՈՒՄՐԻՈՒՄ ՄԵԾ ՀԱՆԴԻՍԱՎՈՐՈՒԹՅԱՄԲ ՆՇՎԵՑ ՀԱՅՐԵՆԱԿԱՆ ՄԵԾ ՊԱՏԵՐԱԶՄՈՒՄ ՏԱՐԱԾ ՀԱՂԹԱՆԱԿԻ 81-ԱՄՅԱԿԸ

 Այսօր մայիսի 9-ն է, հաղթանակի և խաղաղության օրը։ Գյումրիում մեծ հանդիսավորությամբ նշվեց Հայրենական մեծ պատերազմում ֆաշիզմի դեմ տարած հաղթանակի 81-րդ տարեդարձը։ Iravunk. com - ի Շիրակի մարզի թղթակիցը ևս ներկա է գտնվել։ Միջոցառումների շարքը կազմակերպվել էր Գյումրիի քաղաքապետարանի և քաղաքում տեղակայված ռուսական ստորաբաժանումների համատեղ ջանքերով։ Տոնական օրվա մեկնարկը տրվեց թիվ 2 գերեզմանատանը, որտեղ պատվիրակները ծաղիկներ խոնարհեցին եղբայրական գերեզմանին։ Այստեղ հանգչում են տարբեր ազգությունների զինվորների աճյուններ։ Ռուսական 102֊րդ ռազմաբազայի հոգևոր սպասավոր հայր Տիմոֆեյը կատարեց հոգեհանգստի կարգ, աղոթք բարձրացնելով նահատակների հոգիների խաղաղության համար։ Հաջորդ կանգառը «Պատվո բլուր» հուշահամալիրն էր, այն զինվորական գերեզմանատուն է։ 8-րդ զինվորական թաղամասից մեկնարկեց «Անմահ գունդ» քայլերթը։ Բազմաթիվ քաղաքացիներ իրենց պապերի ու հարազատների լուսանկարներով, անցան քաղաքի փողոցներով, խորհրդանշելով սերունդների անխզելի կապը։ Հանդիսության պաշտոնական մասը կայացավ «Մայր Հայաստան» հուշահամալիրում։ Ելույթ ունեցան Գյումրիում ՌԴ պատվո հյուպատոս Իգոր Տիտովը, ռուսական 102֊րդ ռազմաբազայի հրամանատարի պաշտոնակատար Մաքսիմ Կուլակովը, Գյումրիի քաղաքապետի տեղակալ Գագիկ Մանուկյանը։ Միջոցառման մասնակիցները 1 րոպե լռությամբ հարգեցին պատերազմի 20 միլիոն զոհերի հիշատակը։ Ներկաները ծաղկեպսակներ խոնարհեցին Անհայտ զինվորի հուշակոթողին։ Ռուսական կողմը ներկայացրեց զինտեխնիկայի ցուցադրությունը, ներկայացրեցին պատերազմական դրվագների բեմականացումներ։ Հյուրերը հնարավորություն ունեցան օգտվելու «ռազմաճակատային խոհանոցից» համտեսելով հնդկաձավարով շիլա և ռուսական ավանդական սալո։ Տոնական համերգի ընթացքում հնչեցին ռազմահայրենասիրական երգեր։ Վերագործարկվեց «Մայր Հայաստան» հուշահամալիրի ջրային կասկադը։ Գևորգ Սարգսյանը, «Մայր Հայաստան» հուշահամալիր էր եկել իր հորեղբոր Օնիկ Կուրղինյանի լուսանկարով, նա Iravunk. com -ի Շիրակի մարզի թղթակցի հետ զրույցում նշեց, որ հորեղբայրը կռվել է Կերչում, 89֊րդ Հայկական Թամանյան դիվիզիայի կազմում, հրետանավոր է եղել, հերոսաբար կռվել, հասել է մինչև Բեռլին, պարել Հայկական Քոչարին, շատ բարի անձնավորություն է եղել։ Մարդկանց հոսքը չէր դադարում «Մայր Հայաստան» հուշահամալիր, պատերազմի վետերաններից շատերը ցավոք արդեն մեզ հետ չեն ու հեռացել են երկրային կյանքից, սակայն նրանց թոռները, զավակները, ժառանգները չեն մոռանում ու եկել էին պատմելու իրենց պապերի գործած սխրանքների մասին, հպարտանում նրանցով։

Պատրաստեց ՀՈՎՀԱՆՆԵՍ ՍԱՐԳՍՅԱՆԸ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝