Google-ը մոսկովյան դատարանում պարտվել է վճռաբեկ վեճը՝ ՌԴ-ի դեմ պատժամիջոցների հիշատակման պատճառով

Մոսկվայի շրջանի վճռաբեկ ատյանը հաստատել է, որ պետերբուրգյան «Ռադիո 44»-ի վեճը Google-ի հետ՝ AdSense գովազդային ծառայությունում YouTube-յան օգտահաշվի արգելափակման պատճառով, կարող է քննվել ռուսական պետական դատարաններում, հայտնում է «Коммерсантъ»-ը։

2023 թվականի հուլիսին ռադիոյի օգտահաշիվը AdSense ծառայությունում արգելափակվել էր, իսկ գովազդի ցուցադրումը՝ անջատվել. Google-ի աջակցության ծառայությունը դա բացատրել էր միջազգային պատժամիջոցներով։ 2024 թվականին «Ռադիո 44» ՍՊԸ-ն հայց է ներկայացրել ընդդեմ ռուսական « Гугл» ՍՊԸ-ի, ամերիկյան Google LLC-ի և Google Ireland Limited-ի՝ վիճարկելով արգելափակումը և վկայակոչելով այն հանգամանքը, որ ո՛չ ընկերությունը, ո՛չ նրա սեփականատերերն ու ղեկավարները ներառված չեն պատժամիջոցների ցուցակներում։

2025 թվականի մայիսին Մոսկվայի արբիտրաժային դատարանն արգելափակումն ապօրինի է ճանաչել, սակայն մերժել է ապասառեցման պահանջները՝ նշելով, որ ռադիոյի օգտահաշիվը գործում է, բայց 2024-ի սեպտեմբերից YouTube-ի մոնետիզացիան անջատվել է Ռուսաստանից բոլոր դիտումների համար։

Google LLC-ն վճռաբեկ բողոք է ներկայացրել՝ մասնավորապես չհամաձայնելով գործը քննելու ռուսական դատարանների իրավասությանը, քանի որ պայմանագրի պայմաններով՝ կողմերի վեճերը պետք է փոխանցվեին անգլիական պետական դատարաններ կամ Լոնդոնի արբիտրաժ։ Պատասխանողը նաև մատնանշում էր հայցվորի նկատմամբ հստակ պատժամիջոցային ակտի բացակայությունը։

Սակայն Մոսկվայի շրջանի արբիտրաժային դատարանն այս փաստարկները մերժել է՝ նշելով, որ վեճը կապված է պատժամիջոցների հետ, քանի որ հենց պատասխանողներն են վկայակոչել դրանք որպես օգտահաշվի արգելափակման հիմք։ Իսկ ռուսական անձանց և օտարերկրյա կոնտրագենտների միջև պատժամիջոցների հետ կապված վեճերը ՌԴ Արբիտրաժային դատավարության օրենսգրքի 248.1 հոդվածը, որը հայտնի է որպես «Լուգովոյի օրենք», հնարավորություն է տալիս փոխանցելու ռուսական պետական դատարաններին, պարզաբանել է շրջանային վճռաբեկ ատյանը։ Բացի դրանից, դատարանի որոշման մեջ ասվում է, որ պատժամիջոցների հիման վրա ռուսական անձի իրավունքների սահմանափակում թույլատրող իրավունքի նորմերը ենթակա չեն կիրառման՝ ՌԴ հանրային կարգին հակասելու պատճառով։

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝