Գերմանիան կրկնակի կրճատել է ՀՆԱ-ի աճի կանխատեսումը՝ Իրանի հետ պատերազմի պատճառով

Գերմանիայի իշխանություններն այս տարվա տնտեսական աճի կանխատեսումը կրճատել են՝ 1%-ից իջեցնելով մինչև 0.5%։ Հաջորդ տարվա կանխատեսումը նույնպես վատթարացվել է՝ 1.3%-ից մինչև 0.9%։ Հիմնական պատճառը դարձել է էներգակիրների գների կտրուկ աճը՝ ԱՄՆ-ի և Իրանի միջև պատերազմի ֆոնին։ Այս մասին գրում է Bloomberg-ը։

«Այս տարվա համար սպասվող տնտեսության վերականգնումը ևս մեկ անգամ զսպվում է արտաքին աշխարհաքաղաքական ցնցումներով: Իրանում պատերազմը հանգեցնում է էներգակիրների և հումքի գների բարձրացման։ Սա ծանր բեռ է դառնում տնային տնտեսությունների համար և մեծացնում է բիզնեսի ծախսերը», – հայտարարել է երկրի էկոնոմիկայի նախարար Կատարինա Ռայխեն։

Տնտեսության դանդաղումն ուժեղացնում է ճնշումը կանցլեր Ֆրիդրիխ Մերցի կառավարության վրա։ Մինչև 2029 թվականը 140 մլրդ եվրոյի չափով հսկայական բյուջետային դեֆիցիտը փակելու համար իշխանությունները փորձում են կրճատել սոցիալական վճարումները։ Սակայն իշխող կոալիցիայի ռեկորդային ցածր վարկանիշների և աճող գործազրկության պայմաններում կրճատումների շուրջ համաձայնության հասնելը չափազանց դժվար է։

Ներքին իրավիճակը վատթարացնում են նաև Չինաստանի կողմից աճող մրցակցությունը, բարձր գնաճը (այս տարի սպասվում է 2.7% մակարդակում) և բյուրոկրատիայի պատճառով կանգ առած 500 մլրդ եվրոյի ենթակառուցվածքային ծրագիրը։

Գլոբալ մակարդակում ԱՄՀ-ն արդեն զգուշացրել է, որ Իրանի հետ պատերազմը կարող է հրահրել համաշխարհային ռեցեսիա։ Եվ թեև Թրամփը հայտարարել է հրադադարի մասին, խաղաղ բանակցությունները փակուղի են մտել՝ ռազմավարական նշանակություն ունեցող Հորմուզի նեղուցի շուրջ առաջացած լարվածության պատճառով։

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝