Չվճարողները, միեւնույնն է, չեն վճարելու, պարզապես կոնֆլիկտ է առաջանալու եւ ավելի մեծ աղմուկ. Աբգարյան

«Իրավունք»-ը գրել էր, որ Երեւանի քաղաքապետ Տիգրան Ավինյանը քաղաքապետարանի գործավարական նիստում «Երեւանի ավտոբուս» ՓԲԸ տնօրեն Բեգլար Կիրակոսյանից պահանջել է վերահսկել վարորդներին, որպեսզի անմիջական մասնակցություն ունենան տրանսպորտի տոմսի գումարի հավաքագրման պրոցեսներին, ինչպես նաեւ պահանջել՝ ավտոբուսների ֆինանսականը բերել ու զեկուցել հաջորդ շաբաթ կայանալիք նիստի ընթացքում: Այս մասին «Իրավունք»-ը զրուցել է Երեւանի ավագանու «Ազգային առաջընթաց» խմբակցություն անդամ ԻԶԱԲԵԼԼԱ ԱԲԳԱՐՅԱՆԻ հետ:

— Ավինյանի կողմից տրված հրահանգն ապօրինի է, որովհետեւ վարորդի պարտականությունների մեջ չի մտնում զբաղվել գումարի հավաքագրումով: Ավելին, ՔՊ-ն դիմել էր ԱԺ-ին եւ տուգանք սահմանեցին, հսկիչների հաստիքներ ավելացրեցին, սարքավորումներ գնեցին եւ այլն, դա էլ չաշխատեց: Այդ դպքում ինչի՞ համար էր այդ ամենն արվել համայնքային միջոցներով, եթե, միեւնույնն է, իրենց հույսը վարորդն է: Հսկիչների թիվը չի կարող լինել համարժեք բոլոր ավտոբուսների թվի հետ: Նաեւ այլ երկրներում, որտեղ կա էլեկտրոնային համակարգ եւ հսկողության մեխանիզմ, կարող է հսկիչի հանդիպել կամ չհանդիպել: Այսինքն, այնպես չէ, որ հսկիչին ամեն օր մարդիկ կհանդիպեն: Դրա համար էլ քաղաքապետարանը տեսնելով, որ իրենց ուզած թիվը չեն կարողանում հավաքգրել, որոշում են նաեւ վարորդների ուսերին թողնել այդ խնդիրը:
Կարծում եմ՝ եւս մեկ անգամ տապալվելու են, որովհետեւ սա անիմաստ է ՝ չվճարողները, միեւնույնն է, չեն վճարելու, պարզապես, կոնֆլիկտ է առաջանալու եւ ավելի մեծ աղմուկ:

ՆԱՆԱ ՍԱՐԳՍՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝