Գալով իշխանության` Կարապետյանը մեկնարկելու է ոչ թե զրոյական, այլ նիկոլական կետից

Գործարար Սամվել Կարապետյանի քաղաքական ուժի համակարգող եղբորորդին՝ Նարեկ Կարապետյանը, իր հարցազրույցներից մեկում մասնավորապես նշել է. «Մեզ այս տարածաշրջանում անհրաժեշտ է հավասարակշռություն, եւ Թրամփի TRIPP նախագիծը հենց այդ հավասարակշռությունն է, որը կարող է մեր տարածաշրջանի համար երկարաժամկետ խաղաղություն բերել»: Հատկապես Իրանում տեղի ունեցող իրադարձությունների ֆոնին՝ թե որքանով է ասվածի հետ համակարծիք վերոնշյալ քաղաքական ուժին միացած սահմանադրագետ ԳՈՀԱՐ ՄԵԼՈՅԱՆԸ, «Իրավունք»-ը հետաքրքրվեց նրանից:

— Իրանում կատարվելիքն այսօր, անգամ իշխանության խոսույթում է բերել այն բառամթերքը, որ՝ այո, ընդհանրապես TRIPP-ի հետագա գոյատեւման եւ իրականացման խնդիրն այս պահի դրությամբ հարցականի տակ է: Բայց մեր քաղաքական ուժն ունի արտաքին հարաբերությունների զարգացման հստակ տեսլական, եւ մենք, ինչպես պարոն Կարապետյանը հայտարարել է, չենք գալու մեկնարկենք զրոյական կետից, որովհետեւ տեսել ենք զրոյական կետից մեկնարկի ծանրագույն հետեւանքները բոլորիս համար, որոնք եղել են ողբերգական, որն այս իշխանությունն իրեն թույլ տվեց: Մենք ունեցանք պատմական այնպիսի ողբերգական իրավիճակ, որ իրենց զրոյական կետի արդյունքում կորցրինք Արցախը, հազարավոր կյանքեր, եւ այս պահի դրությամբ, անգամ , իրենց կողմից բաժանվող քարտեզի տրամաբանության պայմաններում դեռ ադրբեջանական զինված ուժերի ներկայություն կա ՀՀ ինքնիշխան տարածքում:

Մենք անգամ TRIPP-ի զարգացման տեսլականն ունենք, բայց այդ ամենը պայմանավորված է լինելու նախ գալով իշխանության եւ հասկանալով հողի վրա՝ ինչ ուենք: Այսինքն՝ գույքագրելով իրողությունները, որովհետեւ նախ մենք չգիտենք՝ արդյոք փակ դռների հետեւում լրացուցիչ պարտավորվածություններ ու պայմանավորվածություններ առկա չեն: Եվ երկրորդ՝ մենք կաշկանդված ենք լինելու աշխարհաքաղաքական զարգացումներով, ինչպիսին այսօր, օրինակ, իրանյան պատերազմական իրավիճակն է:

ՆԱՆԱ ՍԱՐԳՍՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝