Չենք սպասելու՝ մինչեւ նախարարի տան «տառականն» էլ սկսի պետական դրամաշնորհներ ստանալ. Սեմյոն Բաբայանն ահազանգում է

Ըստ մամուլում շրջանառվող տեղեկությունների, նախարար Անահիտ Ավանեսյանն առողջապահության նախարարությունը վերածել է «կոռումպացված ընտանեկան բիզնեսի»։ Պետպատվերների մեծամասնությունն իրականացվում է իր մորը պատկանող «Արֆարմացիա» ընկերության կողմից. մեկ տարվա ընթացքում ավելի քան 83 միլիոն դրամի պայմանագիր է կնքվել։ Նույն աղբյուրների համաձայն, Անահիտ Ավանեսյանն օգնում է ամուսնուն պատկանող ընկերություններին արտոնյալ դիրք ունենալ շուկայում։ Օրինակ, սարքավորումների մատակարարման շրջանակներում 53,4 միլիոն դրամի չափով հարկային արտոնություններ եւ պետության կողմից ավելի քան 25 միլիոն դրամ դրամաշնորհներ ստանալ, առանց ինչ-որ հանգամանքի։

Անդրադառնալով վերոնշյալին՝  «Հանրային ազդարար» իրավապաշտպան կազմակերպության նախագահ ՍԵՄՅՈՆ ԲԱԲԱՅԱՆՆ ահազանգում է՝ Ավանեսյանի եւ նրա ընտանիքի անդամների շուրջ ծավալված կոռուպցիոն սկանդալը հասել է օրհասական կետի։

— Մամուլում հրապարակված փաստերը (83 մլն դրամի պետպատվեր՝ մորը, 25 մլն դրամի դրամաշնորհ եւ 53,4 մլն դրամի արտոնություն՝ ամուսնուն) վկայում են պետական կառավարման համակարգում գործող «ընտանեկան կլանի» մասին։

Որպես իրավապաշտպան եւ քաղաքացի՝ հայտարարում եմ. մենք թույլ չենք տալու, որ հանրային միջոցները փոշիացվեն նախարարի տան անդամների բարեկեցության համար։ Եթե Կոռուպցիայի կանխարգելման հանձնաժողովը (ԿԿՀ) կամ իրավապահները փորձեն արդարանալ, թե «գործիքակազմ չունենք» կամ «մշակման փուլում է», դա կդիտարկվի որպես բացահայտ հովանավորչություն եւ հանցագործության պարտակում։ Օրենքը հստակ է՝ շահերի բախումը հանցանք է։

Տան անդամների ներգրավվածությունը. կոռուպցիան միայն նախարարի ստորագրությունը չէ, այլ այն շղթան, որով պետական փողերը հոսում են նախարարի մոր եւ ամուսնու հաշվեհամարներին։ Բոլոր ներգրավված անձինք պետք է կրեն քրեական պատասխանատվություն։

Իրավական գործընթաց. արդեն իսկ ուղարկվել եմ պաշտոնական հարցումներ եւ հաղորդում հանցագործության մասին ԿԿՀ-ին եւ Հակակոռուպցիոն կոմիտեին։
Իմ պահանջը հստակ է. Անահիտ Ավանեսյանը պետք է անհապաղ հրաժարական տա, իսկ իրավապահները պարտավոր են սառեցնել նշված կասկածելի գործարքները։ Մենք չենք սպասելու, մինչեւ նախարարի տան «տառականն» էլ սկսի պետական դրամաշնորհներ ստանալ։ Կոչ եմ անում լրատվամիջոցներին եւ քաղաքացիական հասարակությանը միանալ այս պահանջին եւ թույլ չտալ, որ գործը կոծկվի։ 

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝