«ՀԵՐՈՍԱԲԱՐ ԶՈՀՎԵԼ Է ԴԻՊՈՒԿԱՀԱՐԻ ԿՐԱԿՈՑԻՑ». ԱՆՄԱՀ ՀԵՐՈՍ ՍՈՒՐԵՆ ՓԻԼՈՍՅԱՆ

Մարտի 19-ը, անմահ հերոս ՍՈՒՐԵՆ ԽԱՉԱՏՈՒՐԻ ՓԻԼՈՍՅԱՆԻ ծննդյան օրն է, կդառնար 31 տարեկան։ Նրա հուշարձանին են այցելել հարազատներ, ընկերներ, համագյուղացիներ, ծաղիկներ խոնարհել ու խնկարկել։ Անմահ հերոսի մայրը, տիկին ՆԱԻՐԱ ԽԱՉԱՏՐՅԱՆԸ, Iravunk. com -ի հետ զրույցում, խորը ցավը սրտում պատմեց.«Սուրենս ծնվել է 1995 թվականի մարտի 19-ին, Լոռու մարզի Սպիտակի շրջանի Սարահարթ գյուղում։ Նա մեր ավագ ու տան միակ տղա զավակն էր, ունի քույր։ Որդիս 2001-ին հաճախել է Սարահարթի միջնակարգ դպրոցը, ավարտել է 2012֊ին։ 2013֊ի հունիսի 19֊ին զորակոչվել է Հայոց բանակ ծառայության։ Ծառայում էր Հադրութի զորամասում։ Թանկագին որդիս, շատ էր սիրում ավտոմեքենաներ, քանդում ֊հավաքում էր, վերանորոգում։ Նա միշտ ձգտում էր հասնել իր նպատակներին։ Միաժամակ, մեծ սեր ուներ նաև ընտանի կենդանիների հանդեպ, շատ հոգատար էր, պահում ու կերակրում էր նրանց։ Սուրենս բնավորությամբ շատ հանգիստ, հավասարակշռված, խելացի ու համեստ անձնավորություն էր։ Շատ հարգված ու գնահատված երիտասարդ։ Դեպքի օրը, մարտական ընկերները ափսոսանքով ասել էին, որ երանի ճանաչած չլինեին Սուրենին։ Հունվարի 19֊ի, լույս 20֊ի գիշերը Ղարաբաղա ֊ադրբեջանական հակամարտ զորքերի շփման գծի ողջ երկայնքով, թշնամու կողմից հրադադարի պահպանման ռեժիմը խախտվել է շուրջ 220 անգամ։ Նենգ թշնամին ցուցաբերել է ակտիվություն, տարբեր տրամաչափի զինտեխնիկաներով ռմբակոծության ենթարկել, որի ընթացքում տարբեր տրամաչափի հրաձգային զինատեսակներից հայ դիրքապահների ուղղությամբ արձակվել է ավելի քան 200 կրակոց։ Նույն ժամանակահատվածում, շփման գծի տարբեր հատվածներում, ադրբեջանական զինուժի կողմից ձեռնարկվել են 8 հետախուզական դիվերսիոն գործողությունների փորձեր, որոնք ժամանակին հավաստանշվել են ու կորուստներ կրելով հետ շպրտվել։ Ցավոք, դրանցից մեկը ճակատագրական է եղել Սուրենիս համար։ 2015֊ի հունվարի 20֊ին, հերոսաբար զոհվել է դիպուկահարի կրակոցից։ Զոհվել է տեղում, գլխի շրջանում ստացած վնասվածքի հետևանքով։ Որդիս ընդամենը 5 ամսից պիտի զորացրվեր։ Ինչ էլ լինի, մեր ցավը մնում է ցավ ու երբեք էլ չի սպիանում։ Երբեք չենք կարող համակերպվել այս դաժան իրողության հետ։Սուրենս միշտ ասում էր այսպես.

«Ես անպայման ծառայելու եմ, էլ ինչ տղա, որ չծառայի, հենց հետ գամ, սաղ լավ է լինելու»... Անմահ հերոս Սուրեն Փիլոսյանը, հետմահու պարգևատրվել է այս մեդալներով «Արիության համար», ԵԿՄ կողմից «Երկրապահ», «Զորավար Անդրանիկ», «Միասնություն հանուն հայության» ԲՀԿ ֊ի նախագահ Սուսաննա Իսահակյանի կողմից, «Սպիտակի արծիվ» հուշամեդալի Հայկ Եղիազարյանի կողմից։ Հայրենի Սարահարթ գյուղի ներքևում կառուցվել է տաղավար, հուշաղբյուր ի հիշատակ Սուրենի։ Գյուղի կենտրոնում տեղադրվել է խաչքար։ Գյուղի դպրոցը անվանակոչվել է Սուրենի անվամբ։

ՇՆՈՐՀԱՎՈՐ ԵՐԿՆԱՅԻՆ ԾՆՈՒՆԴԴ, ԱՆՄԱՀ ՀԵՐՈՍ ։ՔՈ ՍԽՐԱՆՔՆ ԱՆՄԱՀ Է, ՔՈ ԱՆՈՒՆԸ ՄԵՐ ՍՐՏԵՐՈՒՄ...

Պատրաստեց ՀՈՎՀԱՆՆԵՍ ՍԱՐԳՍՅԱՆԸ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝