Արփինե Սարգսյանը հրահանգել է ուսումնասիրել, թե ինչու են Փաշինյանի դեմ գրառման համար արցախցի կնոջը փոքրիկի հետ գիշերը տարել ՔԿ

Փաշինյանի դեմ գրառման համար արցախցի կնոջը փոքրիկի հետ գիշերը ՔԿ տանելու դեպքով ՆԳ նախարար Արփինե Սարգսյանը հրահանգել է ուսումնասիրություն սկսել։

«Ես ևս տեսել եմ, թե ինչ է ներկայացնում տվյալ անձը, և եթե այդպես է, շատ մտահոգիչ է։ Ես հանձնարարել եմ Ներքին անվտանգության և հակակոռուպցիոն վարչությանն ուսումնասիրել իրավիճակը, լսել նաև կնոջը և հասկանալ, եթե նմանատիպ իրավիճակ կա, միանշանակ կլինի արձագանք իմ կողմից»,– ասաց Սարգսյանը։

Նրա խոսքով` պետք է ուսումնասիրվեն բոլոր դրվագները, որոնք բարձրաձայնվել են՝ սկսած գործողություն իրականացնելու ժամից, հայտարարություններից՝ «գոհ եղեք, որ ձեռնաշղթաներով չենք տանում, կամ դիմակներով չենք մտել»։

«Պետք է գնահատել տվյալ ժամին գործողության հրատապության աստիճանը»,-ասաց նա։

Հիշեցնենք, որ արցախցի բազմազավակ մայր Գայանե Մեսրոպյանին ՔԿ տանելու  պատճառը մեկ տարի առաջվա ինչ-որ մի գրառում է եղել Նիկոլ Փաշինյանի հասցեին, որում օգտագործել էր «սատկացնել» բառը։ Ոստիկանները դա որակել են բռնության կոչ, քրեական գործ հարուցել ու մեկ տարի անց եկել հինգ երեխայի մոր հետևից և նրան յոթ տարեկան աղջկա հետ Նոր Հաճնից Դիլիջան տարել։

Կնոջը երկու օր հարցաքննել են, նա ասել է, որ Փաշինյանի դեմ մեկնաբանության հեղինակն ինքն է: Այժմ կինը որևէ կարգավիճակ չունի, բայց նրա հեռախոսն առգրվված է։