Ուկրաինայի հարցով եռակողմ բանակցությունների դադարը իրավիճակային է․ Կրեմլ

Ուկրաինական կարգավորման շուրջ եռակողմ բանակցությունների դադարը իրավիճակային Է, այս մասին հայտարարել է Ռուսաստանի նախագահի մամուլի քարտուղար Դմիտրի Պեսկովը։

Նրա խոսքով, Կրեմլը հույս ունի վերսկսել Ուկրաինայի հարցով եռակողմ բանակցությունները, երբ բոլոր կողմերը, մասնավորապես՝ Միացյալ Նահանգները, համաձայնեցնեն ժամանակացույցը։

Նշենք, որ նախորդ օրը Կրեմլի մամուլի քարտուղարը հայտարարել էր Ուկրաինայի հարցով Մոսկվա-Վաշինգտոն-Կիև եռակողմ խմբի գործունեության դադարեցման մասին։ Պեսկովը հայտարարել էր, որ եռակողմ աշխատանքային խումբը դադարեցրել է իր աշխատանքը։

Միևնույն ժամանակ, նա նշել է, որ Ռուսաստանի և Ուկրաինայի միջև գերիների փոխանակման կազմակերպման աշխատանքները շարունակվում են, և որ Ռուսաստանի նախագահի հատուկ ներկայացուցիչ Կիրիլ Դմիտրիևը կապ է պահպանում ամերիկյան կողմի հետ տնտեսական հարցերի շուրջ։

Նշենք, որ այս տարվա սկզբից տեղի է ունեցել Ռուսաստանի, Միացյալ Նահանգների և Ուկրաինայի միջև եռակողմ բանակցությունների երեք փուլ։ Վերջին փուլը տեղի է ունեցել փետրվարի 17-18-ին Ժնևում։ Չորրորդ հանդիպումը նախատեսված էր մարտի սկզբին, բայց հետաձգվել է Մերձավոր Արևելքում հակամարտության պատճառով։

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝